Institucionet e Kosovës nuk kanë bërë një hap përpara në drejtim të shndërrimit të Forcës së Sigurisë së Kosovës në Forca të Armatosura të Kosovës, një forcë e re mbrojtëse, që do të dallonte nga ato që ka sot vendi.
Për themelimin e FAK-ut është i nevojshëm edhe ndryshimi i Kushtetutës së Kosovës. Andaj, kjo dikton nevojën e konsensusit politik me Listën Serbe, pasi ky subjekt përfaqëson aktualisht shumicën e komunitetit serb në Kuvendin dhe në qeverinë e Kosovës.
Anëtarë të partisë politike Lista Serbe kanë deklaruar për radion Evropa e Lirë se kryeministri Isa Mustafa nuk ka ftuar askënd deri tani nga partia që të flasë për këtë çështje.
Deputeti i Listës Serbe, Nenad Rashiq, thotë se deputetët serbë ende nuk kanë marrë një vendim në lidhje me këtë çështje.
“Kryeministri disa herë ka theksuar që do të formohet FAK-u, por, nga ana tjetër, sa u takon deputetëve serbë në Kuvendin e Kosovës, askush nuk ka biseduar me ne. A do të ketë ndryshime në të ardhmen, unë nuk e di, por tash për tash, sa i takon FAK-ut, nuk kemi zhvilluar bisedime,” thotë Rashiq.
Qeveria dhe Ministria e Forcës së Sigurisë së Kosovës janë deklaruar në vazhdimësi se FSK-ja është e gatshme për marrjen e përgjegjësive të reja që mund të dalin nga ky transformim. Por, që të bëhet hapi i mëtejshëm drejt këtij transformimi, do të nevojitet edhe një vendim politik. /tesheshi.com/
