Projektligji për “Trepçën” ka ndarë në dysh kabinetin qeveritar “Mustafa”. Ndërsa, ministrat shqiptarë kanë votuar pro çuarjes në Kuvend të këtij projektligji, ministrat serb kanë dalë kundër.
Ministri i Zhvillimit Ekonomik, Blerand Stavileci, tha se ky projektligj ka për qëllim zhvillimin e infrastrukturës ligjore dhe hapjen e rrugës për investime dhe rivitalizimin e Trepçës.
Por kolegët e tij serbë nuk mendojnë kështu.
Zv.kryeministri Branimir Stojanoviq, tha se anëtarët serbë të kabinetit qeveritar nuk kanë qenë pjesë e hartimit të ligjit.
“Nuk kemi marrë pjesë në hartim të projektligjit, pak jemi kontaktuar. Kjo po bëhet temë politike dhe jo ekonomike. Do të vazhdojmë të jemi kundër”, tha Stojanoviq.
Kundër projektligjit u deklarua edhe ministri i Administrimit të Pushtetit Lokal, Lubomir Mariq.
“Kam shumë të panjohura për këtë projektligj, ka pika kundërthënëse dhe me këtë po dyshoj që po i shkelin marrëveshjet ndërkombëtare siç është MSA. Me këtë ligj po hapim çështje të reja andaj komuniteti serb është kundër këtij projektligji”, tha Mariq.
Për “Trepçën” të premten do të diskutojnë ligjvënësit kosovarë, të cilët më pas do të votojnë pro apo kundër miratimit të tij në lexim të parë. /tesheshi.com/
