Qeveria e Kosovës në mbledhjen e sotme ka ndarë 31 mijë euro për transferin e stafit dhe rialokimin e mjeteve financiare për integrimin e personelit nga fondi i kontingjentit i të ashtuquajturës “Mbrojtja Civile”.
“Duke u bazuar në nenin 4 të Rregullores nr. 2 për fushat dhe përgjegjësitë administrative të Zyrës së Kryeministrit dhe Ministrive, e ndryshuar dhe e plotësuar me Rregulloren nr. 7/2011 dhe të nenit 19 të Rregullores së Punës së Qeverisë së Republikës së Kosovës 09/2011, u propozua aprovimi i vendimit për transferin e stafit prej 50 zyrtarëve, si dhe mjeteve financiare në shumë prej 31.643 euro nga fondi i kontigjencës i paraparë në aneksin e vendimit 06/39 të Qeverisë i datës 22 korrik 2015 për zbatimin e marrëveshjes së Brukselit për shpërbërjen e të ashtuquajturës “Mbrojtja Civile” dhe integrimin e ish-personelit të saj në institucionet civile të Republikës së Kosovës. Ky vendim e rrumbullakëson zbatimin e marrëveshjes për zhbërjen e të ashtuquajturës ‘Mbrojtja Civile’”, u than ë mbledhjen e qeverisë.
Ministrja për Dialog, Edita Tahiri tha me këtë rast se me këtë vendim po i jepet fund integrimit të strukturës “Civilna Zashtita”.
Pavarësisht këtyre deklarimeve të pushtetit, opozita në vijimësi tërheq vërejtjen se kjo strukturë nuk është shuar dhe vazhdon të operojë fuqishëm në veri të Mitrovicës.
Formacioni në veri të Mitrovicës “Mbrojtja Civile”, u formua në vitin 2006, në kohën kur në Serbi qeveriste Vojisllav Koshtunicës, dhe llogaritet t’i ketë pasur mbi 700 pjesëtarë.
Komuniteti serb në veri e sheh këtë formacion si siguri për ta, kurse ekspertë e sigurisë jo rrallë herë kanë deklaruar se rrezikon sigurinë kombëtare.
Kujtojmë se ministrja Tahiri kohë më parë ka deklaruar se “integrimi i ish-pjesëtarëve të mbrojtjes civile në institucione nuk përbën rrezik për sigurinë e Kosovës, apo bartje të informacioneve të rëndësishme për në Serbi” /tesheshi.com/
