Për herë të parë, qeveria shqiptare u drejtohet me një apel shtetasve të vet që mos kultivojnë kanabis. Ka qenë ministri i Rendit, Saimir Tahiri, ai i cili iu ëshët drejtuar shqiptarëve për t’i sqaruar ata se përse ata nuk duhet t’i qasen drogës si mënyrë për të larguar varfërinë.
“Unë i kuptoj qytetarët e zonave më të thella të Shqipërisë, që ngasja për të luftuar varfërinë, i çon te prova për të shkelur ligjin duke mbjellë disa rrënjë kanabis. Nuk i quaj kolumbianë e trafikantë siç bën opozita, por sigurisht i them se kjo nuk është mënyra për të luftuar varfërinë. I kuptoj qytetarët në çdo fshat e qytet, që ngasja për të luftuar papunësinë, i çon te puna e paligjshme në këtë biznes të paligjshëm. As këta nuk i quaj kolumbinë, as i quaj trafikantë, siç bën opozita. Por sigurisht i them se kjo nuk është mënyra për të luftuar papunësinë”, deklaroi Tahiri, ndër të akuzuarit e opozitës si i implikuar në trafikun e drogës.
Më pas, kreu i Rendit është rrekur të bëjë të sinqertin, duke e pranuar se droga është tashmë një problem i madh i shoqërisë, por që sipas tij po luftohet.
“Po, e pranoj i pari, e kemi një problem me kultivimin e kanabisit në vend. Ndonëse shumë më të vogël se kur qeveriste qeveria e kaluar, siç konfirmuan partnerët ndërkombëtarë, por është përsëri një problem që duhet zgjidhur. E duhet ta zgjidhim bashkë me çdo qytetar. E në qoftë se në të kaluarën kishim një problem më të madh për të cilin askush nuk lëvizte as gishtin për ta zgjidhur, sot kemi një problem, ndonëse më të vogël, të cilin ne po e përballim, me transparencë, për ta zgjidhur në mënyrë definitive, së bashku me luftën kundër varfërisë, kundër papunësisë, kundër pabarazisë dhe padrejtësisë që Shqipërisë ia ulën kokën në 20 vitet e kaluara”, theksoi Tahiri.
Kjo është hera e parë që një qeveri u drejtohet me një apel moral shtetasve të vet që mos kultivojnë drogë. /tesheshi.com/
