Qeveria e Kosovës ka shprehur vullnetin për t’i pranuar në institucione shtetërore “kuadrot” e dala nga Universiteti i Mitrovicës Veriore (UMV), institucion ky ilegal i arsimit të lartë. Në kundërshtim me ligjin, diplomat që ka lëshuar ky institucion do të bëhen ligjore.
Një koncept – dokument, i aprovuar javën e shkuar nga kabineti qeveritar, në 36 faqe arsyeton nevojën e gjetjes së një zgjidhjeje që do t’u mundësojë këtyre të diplomuarve në këtë institucion që vepron në veriun e banuar me serbë, për të aplikuar për punësim, shkruan sot “Koha Ditore”.
Gazeta e ka siguruar një kopje të këtij dokumenti. Në të pranohet fakti që UMV-ja ka zhvilluar dhe zhvillon veprimtari ilegale. Megjithëkëtë, Qeveria ka vendosur të ketë qasje “konstruktive” në këtë rast, e cila përbëhet nga një tërësi veprimesh në dy drejtime.
Universiteti në veri të Mitrovicës ka funksionuar që nga paslufta dhe aty kanë diplomuar me mijëra studentë. Ky universitet ka funksionuar pa asnjë lidhje me Ministrinë e Arsimit apo rektoratin. Institucionet e Kosovës nuk kanë pasur qasje në mënyrën e punës në këtë universitet dhe rrjedhimisht nuk dihet se çfarë kualiteti të studimeve ka pasur aty dhe se si janë dhënë diplomat.
