Mazhoranca denoncoi dhe njëherë aspekte të dhunës sipas saj në protestën e opozitës. Ministri Lleshaj dhe kolegia e tij e Drejtësisë Gjonaj, ishte dyshja qeveritare e cila dënoi aspektin problematik të saj, duke paralajmëruar edhe ndëshkime.
“Pati më tepër dhunë, ky është një lajm i keq që tregon dëshpërimin e organizatorëve. Protesta e mbrëmshme u zhvendos në mënyrë të pabesë, tinëzare nga vendi ku ishte kërkuar tek kryeministri drejt parlamentit duke krijuar pasoja të rënda, duke përfshirë qytetarë të palidhur me protestën e duke sjell dëme.
Nga ana e organizatorëve nuk ishin marrë asnjë masë për sigurinë e saj, nuk ishte shpenzuar asnjë burim njerëzor apo material që protesta të zhvillohej brenda hullisë ligjore.
Përkundrazi nga organizatorët ishin marrë masa për të hartuar plan sulmi dhe për të përdorur dhunë kundër institucioneve kushtetuese. Gjatë protestës u konsumuan thirrje të hapura antikushtetuese, për dhunë, për revolucion”, deklaroi ministri i Rendit.
“Nuk janë protesta të qytetarëve, por të nxitura me akte dhune nga lidershipi i tyre. Në këto akte dhune dëmtohet Shqipëria. Nxisim organet ligjzbatuese dhe organet e drejtësisë për të hetuar dhe çuar para drejtësisë përgjegjësit e kësaj dhune dhe për të bërë drejtësi për policët e dhunuar”, deklaroi ministrja Gjonaj. /tesheshi.com/
