Fati i shtëpisë së lindjes së Hitlerit në Austri duket se është vendosur tashmë pas diskutimeve të shumta. Qeveria austriake bën me dije se ka në plan ta shembë atë, e të ndërtojë në vend të saj një godinë të re.
Ministri i Brendshëm, Wolfgang Sobotka, siç raporton gazeta austriake Die Presse, ka thënë se një këshill specialistësh kishte vendosur që ndërtesa të shembej.
“Shtëpia e Hitlerit ka për t’u shembur. Themelet mund të qëndrojnë, por një godinë e re do të ngrihet. Ajo do të përdoret nga një institucion mirëbërës, ose nga autoritetet lokale,” citon gazeta ministrin e Brendshëm.
Fati i kësaj shtëpie është diskutuar prej kohësh në Austri, por çështja ngatërrohej në çdo rast pas refuzimit të posedueses së saj për ta shitur.
Parlamenti austriak pritet të kalojë së shpejti një ligj që e bën të mundur marrjen e shtëpisë.
Me shembjen e shtëpisë kërkohet të shmanget kthimi i saj në një pikë referimi për neonazistët. /tesheshi.com/
