Nga Blendi Gashi
Gjashtë ditë pas mbajtjes së zgjedhje të parakohshme parlamentare dhe shpalljes së rezultateve preliminare ku asnjë prej partive nuk e sigurojë shumicën, po vazhdon debati se kush do ta formojë qeverinë e re në Kosovë.
Krerët e “koalicionit të luftës”, Ramush Haradinaj e Kadri Veseli por edhe zyrtarë tjerë të PDK-së dhe AAK-së në çdo paraqitje mediale flasin me bindje se i kanë 61 numra për formimin e institucioneve të reja duke thënë se ekzekutivi do formohet në afat të shpejtë dhe paprolongime pas certifikimit të rezulateteve.
Por asnjë prej tyre nuk po mund ta thonë se me cilat parti do e bëjnë qeverinë kur LDK shprehet tejet e bindur se nuk bie më në grakën e PDK-së dhe se nuk lidhin koalicion me të edhe sikur t’i bëjnë presion ndërkombtarët, ashtu edhe si aleatët e saj AKR dhe Alternativa.
Nëse LDK nuk i hanë fjalët si tre vjet më parë, pra nuk bashkohet me PDK-në dhe nëse ndërkombëtarët nuk i bëjnë trysni presidentit Thaçi për t’ia dhënë mandatin Vetëvendosje-s për ta formuar qeverinë nëse veç PDK dhe aletatët dështojnë, atëherë si opsion mbetet mbajtja e zgjedhjeve të reja, për të cilion opsion analistët shprehin qëndrime të ndryshme.
Nexhmedin Spahiu, njohës i rrethanave politike, thotë se nëse PAN nuk e formon qeverinë menjëherë pas certifikimit të rezultateve nuk do ta bëj fare më pastaj.
“Ajo që vendosë tani është LDK-ja. Për fatin e saj të keq ajo ka tre alternativa secila më e keqe se tjetra. E para është me ju bashkangjitë PAN-it e me shty edhe një mandat. E dyta me u bë me Vetëvendosjen që nënkupton shkrirje në këtë parti brenda këtij mandati dhe treta më e keqja për që LDK mos me e votu as PAN-in as VV-në dhe vendi të shkojë në zgjedhje të reja ku LDK nuk i merr më pas as 10 deputet dhe VV e formon qeverinë e vetme”, thotë Spahiu, për tesheshi.com.
Analisti tjetër, Albinot Maloku, thotë se formimi i institucioneve të reja pas zgjedhjeve është prioritet që duhet t’i tejkaloj edhe mos-marrëveshjet e mundshme për partnerët e ardhshëm të koalicionit.
Ai konsideron se konform këtij interesi, çdo krizë do të jetë e shkurtër dhe do të formohet qeveria e re.
“Të shkohet në zgjedhje si pasojë e krizave të mundshme mes partnerëve të koalicionit, nuk i konvenon askujt dhe nuk i shoh si mundësi në asnjë rrethanë aktualisht. Zgjedhjet janë mbajtur, ishin të parakohshme dhe më nuk ka askush të drejt të kërkojë zgjedhje pa dëshmuar përgjegjësi”, thotë Maloku për tesheshi.com.
Njohësi i rrethanave politike, Leon Duhanaj, mendon se partitë duhet të gjejnë një zgjidhje dhe të formojnë qeverinë, ndërsa nuk i sheh zgjedhjet e reja si zgjidhje.
“Zgjedhjet kanë qenë jashtëzakonisht të rregullta dhe në linjë dhe frymë demokratike. Asnjë apo .e mirë me thënë ankesa minimale. Edhe rezultatet janë në suaza normale, pasi që kodi zgjedhor nuk mundëson që një parti t’i fitoj mbi 50% të votave. Këndej rezultatet i kemi, përqindjet i kemi, në kushte normale, duhet të pasoj edhe marrëveshja për qeverisje. Partitë politike, duhet t’i lënë anash kalkulimet partiake sepse ato janë të formuara që t’i shërbejnë vendit. Nuk guxon të ketë vija të kuqe. Duhet të mbretërojë vetëm koordinimi programor. Të gjitha arsyetimet tjera janë të pasinqerta dhe nuk i shërbejnë as vendit as qytetarëve”, thotë Duhanaj, për tesheshi.com.
Ai thotë se nëse partitë nuk arrin zgjidhje mes tyre atëherë tregojnë papërgjegjshmërinë e tyre karshi qytetarëve.
“Jo zgjedhje të reja nuk mendoj se do të ketë. Unë e shoh krejtësisht normale që të formohet qeveria. Nëse nuk arrihet kjo gjë, atëherë kemi të bëjmë me parti të papërgjegjshëme”, thotë Duhanaj.
Kujtojmë se neni 95 i Kushtetutës nëse përbërja e propozuar e qeverisë nuk merr shumicën e votave të nevojshme, pra 61 dpeutetë, presidenti brenda dhjetë ditësh emëron kandidatin tjetër sipas së njëjtës procedurë. Nëse as herën e dytë nuk zgjidhet qeveria, atëherë presidenti i shpall zgjedhjet, të cilat duhet të mbahen jo më vonë se dyzet ditë nga dita e shpalljes së tyre./tesheshi.com/
