Nga: Mensur Krasniqi
Pas një nate të errët dhe të përgjakshme në Kuvendin e Maqedonisë, situata pas mesnate është normalizuar me vendosjen e rendit dhe qetësisë publike.
Sipas informacioneve të MPB-së, në protestat e mbrëmshme të simpatizantëve të VMRO-së, si pakënaqësi ndaj përzgjedhjes së Talat Xhaferit kryeparlamentar, janë lënduar 109 persona.
Siç qëndron në kumtesë, deri në ora 23:30, në spitalin e qytetit “8 Shtatori”, në spitalin, “Shën Klimenti i Ohrit” dhe në Qendrën Klinike, ndihmë mjekësore kanë kërkuar 70 qytetarë, 22 nëpunës policorë dhe tre deputetë. Në mënyrë shtesë, në kazermën Gjorqe Petrov ndihmë mjekësore u është dhënë edhe shtatë personave të tjerë.
Nga MPB-ja theksojnë se, për shkak të gjendjes së mëparshme të sigurisë, MPB-SPB Shkup do të ndërmarrin masa dhe aktivitete shtesë me qëllim të mbrojtjes së sigurisë së qytetarëve, objekteve dhe sigurimit të gjendjes stabile dhe të volitshme të sigurisë.
Sipas informacioneve të MPB-së, në Kuvendin e Republikës së Maqedonisë pas mesnatës nuk ka pasur asnjë qytetar, ndërsa ata që kanë protestuar kanë qenë jashtë Kuvendit.
Protestuesit nga dje kanë filluar me vendosjen e tendave, duke paralajmëruar se do të bllokojnë Kuvendin dhe nuk do të lejojnë zhvillimin normal të seancave në të.
Bogdan Ilievski, nga iniciativa “Për Maqedoni të përbashkët” (simpatizantë të VMRO-së), gjatë qëndrimit para Kuvendit ka thënë se ata nuk përkrahin asnjë dhunë dhe se dhuna është e keqe, por kur i ndodh një padrejtësi popullit, atëherë askush nuk mund t’i kontrollojë.
“Ne jemi këtu 60 ditë në rrugët me energji të mirë, sot tentuan të bëjnë grusht shtet, ndërsa ju ndodhi popullit, askush këtë nuk mund ta kontrollojë. Një gjë është e qartë, se do të qëndrojmë këtu deri sa të sqarohet situata. Kjo mund të mos jetë vetëm një natë e gjatë, mund të jenë dy, tre, pesë javë, por njerëz nuk kemi opsion tjetër,” ka thënë Ilievski.
Pas evakuimit të të gjithë deputetëve nga Kuvendi, lideri i LSDM-së, Zoran Zaev, diku rreth orës dy pas mesnate është pritur nga qindra anëtarë dhe simpatizantë të LSDM-së në selinë e kësaj partie.
Ndërkaq, kreu i VMRO-DPMNE-së, Nikolla Gruevski, pas rikthimit urgjent nga udhëtimi zyrtar në Austria, rreth orës katër pas mesnate ka mbajtur një konferencë për shtyp, në të cilën ka thënë se dënon dhunën që ka ndodhur në Kuvend, ku u sulmuan disa deputetë.
Ai u ka bërë thirrje institucioneve që të reagojnë shpejt dhe të zbulojnë dhunuesit.
“Nuk kam qenë për atë që me dhunë të mbetem në pushtet, dhe nuk kam përkrahur mënyrë të tillë tek të tjerët. Bëj thirrje të mos trajtohen të gjithë njëlloj ata që po protestojnë para Kuvendit. Përshëndes përpjekjet e deputetëve të VMRO-DPMNE-së, të cilët bënë gjithçka për të ndihmuar deputetët e lënduar,” ka deklaruar Gruevski.
Ai tha se dënon mënyrën se si LSDM-ja dhe partitë e tjera kanë vendosur që, siç e quan ai, në mënyrë joligjore të zgjedhin kryetarin e Kuvendit, duke rritur kështu në mënyrë të vetëdijshme tensionet.
“Provokimet e shumta ndaj popullit maqedonas janë arsyeja direkte për këtë eskalim. Mënyra se si kanë zgjedhur kryetar është plotësisht jo ligjore dhe jashtë rregullores. Udhëheqësia e LSDM-së e di mirë këtë, dhe me vetëdije vendosën që të shkelin ligjin dhe në mënyrë direkte kanë shkaktuar incidente,” ka thënë më tej Gruevski.
Ai ka shtuar se në ditët në vijim VMRO-DPMNE do të publikojë hapat që do të ndërmarrë, ndërsa ka kërkuar që të pranohet takimi i liderëve i propozuar nga presidenti Ivanov.
“Rikujtoj se publikisht kam folur për rreziqet e tilla nga ana e LSD-së dhe i bëj thirrje qytetarëve të mos bien pre e provokimeve të LSD-së. Dikush ka dashur të shkaktojë kaos dhe dëmin ta shfrytëzojë. Populli ka të drejtë të mbrojë shtetin, ndërsa thirrja për metoda të dhunshme shkon në dëm të të gjithëve. Ata që e kanë bërë skenarin dëshirojnë të jetë në hije përzgjedhja jashtë ligjit e kryetarit të kuvendit. Qëllimi i tyre është që për dhunën të fajësohet VMRO-DPMNE,” ka thënë Gruevski, duke shtuar se qytetarët të rrinë të qetë dhe të mos bien pre e provokimeve.
Përveç liderëve partiakë në Maqedoni, aktin e dhunës në Kuvend e ka dënuar thuajse i gjithë komuniteti ndërkombëtar, në mesin e tyre edhe rurokomisioneri Johannes Hahn dhe përfaqësuesja e lartë e BE-së, Frederika Mogherini.
Kujtojmë se nga deputetët më të lënduar gjatë mbrëmjes së djeshme ishin lideri i LSDM-së, Zoran Zaev, lideri i Aleancës për Shqiptarët, Ziadin Sela, dhe disa deputetë tjerë me lëndime më të lehta. /tesheshi.com/
