Dy të plagosur është bilanci i një përplasjeje me armë për qërim hesapesh mes dy grupeve kriminale serbësh që ka ndodhur të dielën vonë në veri të Mitrovicës, kanë njoftuar burime të portalit tesheshi.com.
Të shtënat, plagosjen e dy personave dhe dërgimin e tyre në spitalin në veri të Mitrovicës, e ka konfirmuar edhe policia e Kosovës në Mitrovicë.
Burime të portalit kanë informuar se personat e plagosur janë Aleksandar Kostiq si dhe Stefan Caviq, ky i fundit në gjendje shumë të rëndë shëndetësore.
E tërë ngjarja ka ndodhur në rrugën kryesore të veriut të Mitrovicës, në ‘Kral Petër”, ku ka një frekuentim të madh të njerëzve gjatë orëve të mbrëmjes, e sidomos nga të rinjtë.
Burimet më tej kanë shtuar se të shtunën, pak para mesnate, grupe të rinjsh serbë janë rrahuar mes veti në një kafiteri në Zveçan, dhe për këtë shkak një natë më pas ka ndodhur përplasja me armë zjarri e tyre në veri të Mitrovicës.
Burime të portalit, por edhe zyrtarë të policisë së Kosovës, kanë theksuar se në veri të Mitrovicës dhe të Kosovës po ka një rritje krimi në mes grupeve të të rinjve serbë, të cilët pothuajse çdo javë përplasen me njëri-tjetrin deri në përdorim të armëve të zjarrit. /tesheshi.com/
