Shpëtoi shumë njerëz që i gjeti nën rrënojat e shkaktuara nga tërmeti i tmerrshëm që goditi Ekuadorin më 17 prill. Punoi fort në zonën e Pedernales, pranë me kolegët e tij dhe më pas, i sfilitur nga puna, ndërroi jetë për shkak të lodhjes.
Emri i tij është Dayko dhe është një qen i llojit Labrador, i cili do të kujtohet si një hero në vendin e tij.
“Faleminderit për punën tënde Dayko. Askush nuk do ta harrojë punën tënde heroike në atë situatë emergjente që përballuam”, shkruajnë zjarrfikësit e skuadrës së tij.
Siç raporton Metro.uk, Dayko nuk e mori në konsideratë nxehtësinë, dehidratimin dhe lodhjen përpara shpëtimit të sa më shumë jetëve njerëzore që të ishte e mundur. Iku nga kjo botë si një hero. Edhe mediat lokale e kanë përshëndetur me këtë fjali: “Qeni që dha jetën për punën e tij”. /tesheshi.com/
