Me të përfunduar procesi zgjedhor, kryeministri Rama shpalli kredon e tij për një pakt me opozitën.
“Nëse duan paqe politike paqe do të kenë vetëm duke u tërhequr nga sulmet kundër Shqipërisë në gjuhë të huaj.
Nëse duan marrëveshje për Shqipërinë, marrëveshje do të kenë pa kushte. Dora ime është e shtrirë, reforma zgjedhore mbetet një sfidë e përbashkët me opozitën parlamentare dhe jo-parlamentare.
Kjo e fundit ka një karrige bosh në komision, ndërsa reforma në drejtësi nuk negociohet dhe as diskutohet por vetëm mbështetet. Nuk kam as deponimin minimal për asnjë pazar politik për ndjenjat e askujt”, ka thënë Rama, duke e konsideruar të suksesshëm procesin e votimit.
Për këtë, nuk harroi të falenderonte ndërkombëtarët, ata të cilët u pozicionuar kundër aksionit ekstrem të opozitës, që më djegien e mandateve, e më pas me bojkotin e 30 qershorit.
“Faleminderit SHBA, BE-së. Kjo ishte një betejë e rëndë dhe absurde. Sot ishte dita e zgjedhjeve vendore të radhës që u kthye muaj pas muaji në ditën kulmore të një përplasje historike mes të shkuarës dhe të ardhmes, mes harbutërisë dhe qytetarisë, anti shtetit dhe shtetit, mes dhunës së djeshme dhe shpresës te e nesërmja, mes Shqipërisë së vjetër të fantazmave e fosileve të historisë dhe Shqipërisë së të drejtës”, theksoi kreu i mazhorancës.
E tashmë kur pritet që dhe bashkitë e PD-LSI t’i kalojnë PS-së, Rama premtoi se nuk do ketë ndëshkime të pamerituara në administratë.
“Kush kaloi vijën e kuqe duhet të ndëshkohet, ndërsa kush ka qenë thjeshtë viktimë nuk duhet dhe nuk do të preket kurrsesi për të vijuar punën në administratë.
Asnjë grua apo vajzë nuk do të largohet. Vendet e zëna me kushërirllëk apo pa meritë nuk kanë si të justifikohen e as mos pastrohen. Është koha për një politikë të re, hapje të re, dhe të strukturuar të PS-së ndaj njerëzve të zot për t’i shërbyer shtetit që po përpiqemi të ndërtojmë”, tha Rama. /tesheshi.com/
