Vetëm gjysmë ore gjatë javës e qëndrimit në natyrë, e kjo vlen edhe për parqet e qytetit, është e mjaftueshme për të zvogëluar rrezikun e presionit të lartë të gjakut dhe depresionit.
“Nëse secili prej nesh do të vizitonte parkun në zonën e tyre urbane gjysmë ore në javë, do të kishim 7 për qind më pak depresion dhe 9 për qind më pak tension të lartë”, thotë ekologja Danielle Shanahan nga Universiteti Queensland.
Shanahan dhe ekipi i saj kanë mbledhur dhe analizuar të dhënat nga 1,538 banorë të Brisbanes, të cilët iu përgjigjën pyetësorit për shprehitë e tyre javore të lëvizjes në natyrë dhe aktivitetet fizike, dhe pastaj vlerësuan shëndetin e tyre mendor dhe fizik.
Ata kanë gjetur se njerëzit që lëvizin rregullisht për të paktën gjysmë ore në javë, kanë këtë përqindje më të ulët të depresionit të moderuar ose të rëndë, ankthit dhe stresit dhe një rrezik më të ulët të presionit të lartë të gjakut.
Gjithashtu është vërtetuar se këta njerëz kanë një kohezion më të mirë social ose një gatishmëri më të madhe për të bashkëpunuar me të tjerët në situata shoqërore.
Rezultatet e publikuara në revistën Scientific Reports janë një shtesë për hulumtimet ekzistuese mbi përfitimet e qëndrimit në natyrë. /tesheshi.com/
