Në prag të publikimit të progres-raporteve të BE për vendet e Ballkanit Perëndimor, ministri gjerman i shtetit, Michael Roth, iu drejtua opinonit gjerman me një koment në gazetën “Frankfurter Allgemeine Zeitung” – raporton DW.
Michael Roth, i cili është edhe vetë deputet socialdemokrat, por edhe përgjegjës për politikën gjermane në Bashkimin Evropian, ka përsëritur kërkesën për çeljen e negociatave të BE-së me Shqipërinë dhe Maqedoninë e Veriut. Ai kujton, se “qysh në vitin 2013 krerët e qeverive dhe shteteve të BE-së i kanë premtuar rajonit të Ballkanit Perëndimor perspektivën evropiane” dhe se “ky premtim u përsërit një vit më parë, në vitin 2018”.
Nisur nga rekomandimi i përsëritur i Komisionit të BE-së për çeljen e negociatave me Shqipërinë dhe Maqedoninë e Veriut, ministri gjerman i shtetit kërkon nga BE-ja që të mbajë fjalën.
“Duhet të mbajmë fjalën e dhënë. Sepse në Ballkanin Perëndimor janë shumë gjëra në rrezik. Ndërsa për BE-në janë në rrezik interesat e sigurisë dhe besueshmëria e saj.
Për të rinjtë në Shqipëri dhe Maqedoninë e Veriut Evropa e Bashkuar nuk ka humbur aspak nga fuqia e saj rrezatuese. Shumica e të rinjve dëshirojnë demokraci, mirëqënie, siguri dhe liri.
Shqipëria dhe Maqedonia e Veriut i kanë kryer detyrat e tyre dhe kanë arritur përparime konkrete. Në të dy vendet si qeveria ashtu edhe populli kanë dëshmuar, se janë të gatshëm për të bërë edhe kompromise të dhimbshme”, shkruan Roth, raporton DW.
Në pjesën për Shqipërinë, ministri shtetit thotë se “në vështrim të parë situata mund të duket më e komplikuar. Por arsyeja është, sepse opozita ia del vazhdimisht që të prodhojë tablo dramatike – në vend që të konkurojë me qeverinë me ide konstruktive në parlament, të cilin për momentin e bojkoton.”
Roth tërheq vëmendjen se: “kjo politikë e papërgjegjshme penguese nuk duhet të fshehë atë që ka arritur vendi”, duke veçuar Reformën në Drejtësi.
Sa i përket Maqedonisë së Veriut, minisitri i shtetit Roth thekson, se me arritjen e Marrëveshjes mes Maqedonisë së Veriut dhe Greqisë për çështjen emrit, hapet rruga për të ndjekur rekomandimin që komisoni i BE-së e ka dhënë vazhdimisht prej vitit 2009 për çeljen e negociatave.
