Selia e Shenjtë u tha katolikëve të hënën se është moralisht e pranueshme të përdoren vaksina anti-COVID edhe nëse qelizat nga indet e fetuseve të abortuara janë përdorur për t’i prodhuar ato.
Interpretimi i Kongregatës për Doktrinën e Besimit është se vaksinat e tilla lejohen për sa kohë që nuk ka asnjë alternativë.
Siç shpjegoi Konferenca e Ipeshkvijve të SHBA më parë në një deklaratë të veçantë për Katolikët e SHBA javën e kaluar, vaksinat e prodhuara nga Pfizer dhe Moderna janë në një farë mase të lidhura me qelizat e indeve fetale të abortuara në shekullin e kaluar.
Shpjegimi që mbërriti nga Vatikani shprehet se dhënia e legjitimitetit moral për përdorimin e një vaksine të tillë bazohet në parimin e “shkallëve të ndryshme të përgjegjësisë për bashkëpunimin në të keq”. Kjo, sipas interpretimit, do të thotë se për shkak të faktit se një pandemi paraqet një rrezik kaq të madh, vaksina të tilla mund të përdoren “sipas ndërgjegjes dhe me dijeninë se nuk përfaqëson pjesëmarrje në abort nga i cili burojnë qelizat e përdorura për të prodhuar vaksinën”.
Në mungesë të një vaksine të sigurt të marrë nga burime të tjera, “është moralisht e pranueshme të marrësh një vaksinë për COVID-19 në të cilën qelizat e fetuseve të abortuara janë përdorur gjatë kërkimit dhe prodhimit”.
Peshkopët amerikanë kanë njoftuar se linjat qelizore të përdorura në dy aborte të kryera në vitet 1960 dhe 1970 u përdorën në vaksina dhe interpretimi i Vatikanit është se përdorimi i një vaksine të tillë “nuk justifikon në vetvete indirekt abortin”.
Megjithatë, industria farmaceutike është sugjeruar që ajo të zhvillojë një vaksinë që është plotësisht e pranueshme nga ana etike, ndaj, qeverive dhe organizatave ndërkombëtare u është thënë që një vaksinë e tillë duhet të vihet në dispozicion edhe për vendet e varfra.
Interpretimi i Vatikanit gjithashtu i referohet vaksinimit në vetvete, i cili është vullnetar, por rekomandohet “për të mirën e përbashkët dhe veçanërisht për të mbrojtur më të dobëtit dhe më të ekspozuarit (të infektuarit)”. /tesheshi.com/
