Presidenti Thaçi është pozicionuar tashmë karshi çështjes së taksimit të mallrave serbë me vendim të qeverisë Haradinaj, gjë që ka sjellë një ngërç të madh në dialogun mes Prishtinës dhe Beogradit.
Një prononcim i tij i fundit me amerikanen Washington Post, ka bërë të qartë se ai është për heqjen e saj, por jo pa kushte.
“Kosova është gati të shqyrtojë heqjen e taksës për produktet serbe nëse Kosovës i jepet një rrugë e qartë drejt arritjes së një marrëveshjeje finale paqësore me Serbinë, i kam thënë gazetës ‘The Washington Post’, duke kërkuar që SHBA-ja të marrë rol udhëheqës në koordinimin e inputit ndërkombëtar për Marrëveshjen Paqësore finale që do të sjellë njohjen e Kosovës nga Serbia. Ndërgjegjja jonë na kërkon – dhe është detyrë e jona historike – që të bëjmë paqen të mundshme dhe të vërtetë”, ka deklaruar Thaçi.
Ndërkohë, deri më sot ai kishte heshtur rreth vendimin drastik të kabinetit Haradinaj. Taksimi është vënë si kusht për njohjen e Kosovës nga Serbia, ndërkohë që nga Beogradi thuhet se pa heqjen e detyrimit të ashpër doganor nuk ka rinisje të dialogut.
I ngacmuar nga letra e Trump, Thaçi kërkon rihapjen e dialogut në ecjen drejt një marrëveshjeje të pretenduar si “historike”, por tashmë pengesë mbetet taksa. Këtë, presidenti kosovar e paralajmëroi pak ditë më parë, në një mesazh të shkurtër në FB, ku shkroi për “akte populiste”
“Derisa po përmbyllim dekadën e dytë të çlirimit, pashmangshëm duhet të reflektojmë për të arriturat, sfidat dhe trashëgiminë që do t’ua lëmë pas fëmijëve tanë.
Unë jam shumë krenar për të arriturat tona si gjeneratë. Por, do të ishte e pafalshme, që brezave të rinj t’ua lëmë peng të ardhmen për shkak të akteve populiste dhe mungesës së guximit për të përmbyllur konfliktin shekullor me Serbinë.
Për më tepër, njohja reciproke mes Kosovës dhe Serbisë do të niste edhe një proces thelbësor të transformimit të lidershipit dhe modelit qeverisës në vendin tonë. Besoj shumë që pas marrëveshjes do të fillojë një epokë e re, ku askush më nuk do të mund të pretendonte të fitonte vota në emër të betejës së papërfunduar politike me Serbinë”, shkroi ndër të tjera Thaçi.
Tashmë, pas kundështive për kufijtë, pritet që mes tij dhe Haradinajt të futet si pykë dhe taksa ndaj Serbisë. /tesheshi.com/
