Ambasadori i SHBA në Kosovë, Phillip Kosnett përsëriti se Shtetet e Bashkuara besojnë se pezullimi i taksës për mallrat nga Serbia do të ndihmojë në avancimin e procesit të negociatave me Kosovën dhe Serbinë sa më shpejt që të jetë e mundur.
Në një intervistë me KTV, ai tha se qeveria amerikane beson se në vitin 2019 mund të arrihet një marrëveshje gjithëpërfshirëse midis Serbisë dhe Kosovës.
Ai theksoi se Shtetet e Bashkuara nuk i kërkojnë Kosovës të heqë përgjithmonë taksën, por t’i pezullojë ato përkohësisht.
“Ne besojmë fuqimisht se pezullimi i përkohshëm i taksës sa më shpejt të jetë e mundur, do të ndihmojë procesin që të shkojë përpara. Nëse kjo nuk ndodh, ekziston rreziku i humbjes totale të momentit, e cila do të ndikojë keq në popullsinë e Kosovës dhe Serbisë, dhe kjo e keqe do të pasqyrohet në SHBA dhe Bashkimi Evropian”, tha Kosnett.
Ai shtoi se nuk është çështja nëse Kosova ka të drejtën e vendosjes së taksave, por nëse është një vendim i mirë për Kosovën dhe për Shtetet e Bashkuara.
Kosnett theksoi se pezullimi i përkohshëm i taksës është e vetmja mënyrë për të përmirësuar procesin e dialogut me Serbinë.
Ai tha se Shtetet e Bashkuara e konsiderojnë të rëndësishme që dialogu me Serbinë të vazhdojë sa më shpejt që të jetë e mundur.
Ambasadori tha se SHBA nuk duan të imponojnë ultimatum e as të diktojnë punën e qeverisë së Kosovës.
Ai siguroi Uashingtoni nuk do të vendosë sanksione ekonomike për Kosovën, siç është përfolur në disa media.
“Unë dua të siguroj qytetarët e Kosovës se nuk është e vërtetë. Kjo nuk është mënyra me të cilën ne i trajtojmë vendeve mike, të tilla si Kosova”, tha Kosnett.
Por nëse Kosova mban një politikë që e bën të vështirë ose të pamundur përparimin në ndërtimin e paqes, prosperitetit dhe drejtësisë në Ballkan, SHBA do të jenë të shqetësuar dhe të zhgënjyer, thotë ai.
“Kam dëgjuar se disa zyrtarë në Kosovë thonë se SHBA nuk është më e nevojshme. Unë mendoj se qytetarët e Kosovës nuk mendojnë kështu dhe se ata nuk pajtohen me këtë qëndrim. Populli i Kosovës do të mbajë marrëdhënie të ngushta me SHBA-të. Nëse Kosova vendos se kjo nuk ka rëndësi, do të shohim çfarë do të ndodhë në të ardhmen”, tha Kosnett.
“Ne besojmë se Kosova duhet të pezullojë përkohësisht taksat për një periudhë të caktuar kohe dhe, sinqerisht, kjo do të çonte në shpresën se Beogradi do të marrë masa konstruktive nga ana tij”, tha Kosnett. /tesheshi.com/
