Një qendër e re studimore mbi Islamin pritet të hapet në ditët e para të 2016-ës në Britani. Qendra e re e Oksfordit për Studimet Islame duhet të jetë gati në fund të këtij viti, për të hapur dyert më pas për studentët e të tjerët që janë të interesuar.
Në një rrëfim për Oxford Mail, sekretari Richard Makepeace shpjegon se ndërtesa do të hapet në faza, ndërsa, për shembull, biblioteka është aktualisht në punë.
Puna për ndërtimin e kësaj qendre të re pati filluar në vitin 2002, dhe qe shpresuar që ajo të hapej dy vite më vonë. Por financimet e vonuara dhe punimet e ngadalta e shtynë hapjen e saj për trembëdhjetë vite më vonë.
Makepeace thotë se, “Do të jetë një institut që do të qëndrojë për shumë vite, dhe ne nuk deshëm të nxitojmë. Lëvizja ka qenë një proces gradual.”
Qendra e re do të ketë një auditor, një librari, sallën e ngrënies, si dhe një xhami.
“Do të jetë një institut musliman në të njëjtën mënyrë që shumë kolegje janë institute kristiane. Qendra do të përdoret nga muslimanët dhe jomuslimanët. Ne shpresojmë se ajo do të sjellë më shumë nga Oksfordi për botën muslimane, e më shumë nga bota muslimane për Oksfordin,” shpjegon Richard Makepeace.
Me hapjen e dyerve të ndërtesës së re, qendra do të lëvizë nga vendndodhja aktuale në George Street.
Qendra e Oksfordit për Studimet Islame u krijua në 1985-ën, dhe është një qendër e pavarur në Universitetin e Oksfordit. /tesheshi.com/
