Banorët e Shkupit në shumë raste janë ankuar për rritjen e numrit të maceve dhe qenve endacakë të cilët nxjerrin hedhurinat jashtë konteinerëve. Disa prej tyre ankohen se qentë janë agresivë, madje edhe sulmojnë njerëz. Shifrat jozyrtare tregojnë se në Shkup ka rreth 10 mijë qen endacakë, ndërsa stacioni në Vardarishtë për strehimin e përkohshëm të qenve ka kapacitet vetëm për rreth 1300 qen.
Për mos zgjidhjen e këtij problemi nga ana e institucioneve, persona të panjohur kanë hedhur helm nëpër udhëkryqet më të frekuentuara dhe nëpër hapësirat e gjelbra të qytetit ku kanë ngordhur qen dhe mace.
Kryetari i Qytetit të Shkupit, Petre Shilegov thotë se hedhja e helmit gjithandej, mund t’i rrezikojë edhe fëmijët që luajnë nëpër parqe.
“U bëj thirrje të gjithë qytetarëve të cilët do të vërejnë helme të hedhura në mjedis apo personat që e bëjnë një gjë të tillë, menjëherë ta paraqesin në polici me qëllim që të shmangim rreziqe të përmasave më të mëdha”, tha Petre Shilegov.
Nga Shoqata për mbrojtjen e kafshëve “Anima Mundi” thonë se do t’i padisin personat përgjegjës për helmimin e qenve endacakë në vende publike. Njëherazi, nga kjo shoqatë kërkojnë ndihmën e qytetarëve për lokalizimin e helmuesve potencial.
“Fotografojini shpalljet publike të të gjithë dhunuesve me qëllim që të mos i fshijnë dhe fotografitë dorëzojini te ne. Ne për çdo rast, nëse ka bazë ligjore, do të parashtrojmë padi kundër tyre”, thonë nga Anima Mundi.
Edhe nga ndërmarrja komunale për higjienë paralajmërojnë që të mos merren masa me vetiniciativë kundër kafshëve endacakë, sepse në këtë mënyrë mund të rrezikohet edhe shëndeti i njerëzve.
“Problemi nuk zgjidhet përmes helmimit, sepse me anë të helmimit të kafshëve ekziston rreziku i helmimit edhe të njerëzve. Problemin assesi nuk do ta zgjidhin në këtë mënyrë. U bëj thirrje qytetarëve që, nëse vërejnë ndonjë qen agresiv i cili paraqet rrezik për sigurinë e qytetarëve, të telefonojnë në telefonin kujdestar”, shprehen nga Higjiena Komunale.
Miradie Hasani – /tesheshi.com/
