Godina e komunës së Mitrovicës është sulmuar me armë zjarri, aty rreth orëve të para të mëngjesit të së enjtes, e për pasojë janë thyer disa xhama në katin e tretë.
Zëdhënësja e komunës, Blerina Kastrati tha se “ka pasur disa dëme materiale, e se njësitet policore po punojnë për identifikimin e personave të cilët kanë qëlluar”. Ndërsa për kreun e komunës, Agim Bahtiri, veprime të tilla kriminale kanë për qëllim destabilizim e situatës aktuale.
Një ditë më parë, komuna e Mitrovicës u përfshi në një tjetër incident, kur disa automjete të saj u dëmtuan qëllimisht në një parking. Autorë ishin 5 roje të parkingut, ish-veteranë të UÇK-së, të cilët zgjodhën këtë formë për t’u hakmarrë për largimin e tyre nga puna.
Por deri më tani nuk ka asnjë të dhënë për lidhje mes dy incidenteve. /tesheshi.com/
