Emisioni i njohur ‘Opinion’ i gazetarit Blendi Fevziu u përfshi nga një debat i ashpër mes palëve politike në një debat, për shkak të një fjale që tashmë është futur në ligjërimin politik, specifikisht të opozitës: “aleanca e qelbësirave”! Ishin Taulant Balla i PS-së me Luan Ramën e LS-së, të cilët reaguan ashpërsisht ndaj znj. Grida Duma, pas artikulimit prej saj të kësaj fjale, gjatë një komenti të saj.
Eshtë ndër fjalët më të rënda, një lloj ofeze, që pasqyron dhe degradimin e debatit politik në Shqipëri. Por si është “historia” e kësaj fjale? Nga ka buruar ajo dhe si shkoi e u vendos në gojën e opozitës?
Kjo fjalë, ka qenë pjesë e një shkrimi të Mustafa Nanos në gazetën DITA, dy-tre vjet të shkuara, ku gazetari dhe opinionisti në fjalë, i ka mëshuar faktit se për largimin e Berishës, do ia vlente të kishte një aleancë me çdo forcë politike opozitare (thënë afërsisht: “sado e qelbur të dukej”), mjaft që Berisha të mos ishte më në krye të qeverisjes së këtij vendi.
Sipas kontekstit të shprehjes, Nano ka dashur të ec me parimin e zgjedhjes së të keqes më të vogël përballë asaj më të madhe. Pra, me fjalë të tjera, ai ka dashur të thotë se nuk i honeps ca parti në opozitë- madje i duken dhe të qelbura – por që mund të vlejnë në një situatë të caktuar, siç ka qenë për gjykimin e tij, imperativi i largimit të PD-së nga pushteti.
Por në këtë “aleancë me qelbësira”, Nano nuk ka përmendur LSI-në. Në kohën kur është shkruar shkrimi madje, një aleancë PS-LSI dukej gati e pamundur. Dhe e vetmja dilemë, është se tek “qelbësirat” e Nanos llogaritej ose jo edhe LSI-ja.
Edhe nëse llogaritej, më e rëndësishme është të potencohet konteksti i frazës, ku më shumë se për të goditur të majtën, ajo ka goditur rëndë pikërisht PD-në dhe Berishën. Por paradoksi është që pikërisht opozita, e ka marrë frazën e rëndë kundër saj (gjithnjë në kontekstin e thënë), duke ia ndryshuar kahjen e adresimit.
Kjo ishte e gjithë historia e frazës aspak të hijshme “aleanca e qelbësirave” /tesheshi.com/
