U realizua të hënën në mbrëje takimi i parë mes naftëtarëve të Ballshit dhe kryeministrit Rama, pas lënies nga të parët të grevës së urisë, kusht i vënë nga i pari i qeverisë për t’u ulur e zgjidhur hallin e pagave.
Rama ka shmangur me stil një precedent, atë që qeveria t’u japë naftëtarëve pagat që janë detyrim i privatit, duke zgjedhur t’i ndihmojë financiarisht, e t’u mundësojë rikthimin e aktivitetit të Rafinerisë.
“Çështja e këtyre njerëzve ssot është një çështje që na takon neve për ta adresuar. Rruga e thjeshtë ligjore ishte që të drejtoheshin për të marrë asistencën.
Në këtë rast bëhet fjalë për një grup njerëzish që kanë eksperiencë dhe një formim profesional që nuk kemi luksin ta zhbëjmë. Ne kemi arritur që qeveria të marrë përsipër një ndihmë financiare.
Nuk mund të jetë paga e punës së tyre por natyrisht do flasim për pagën e asistencës. Nuk është çështja jonë e pagave të prapambetura. Është çështje e kompanisë dhe për vendimi gjyqësor që ato flasin është për kompaninë dhe jo për qeverinë.
Jemi duke bërë përpjekje çdo ditë. Janë shumë familje që po vuajnë nga kjo situatë. Eshtë një ofertë e arsyeshme pasi marrim përsipër të paguajmë duke pasur parasysh që nuk janë një grup i zakonshëm punëtorësh dhe ne nuk duam t’i humbasim. Do të vendosim në dispozicion një shumë të konsiderueshëm. Do të jetë diçka e ndërmjetme mes asistencës dhe pagës së tyre”, tha Rama.
Ndërsa kreu i Sindikatës së Naftëtarëve Sokol Dautaj, tha se do diskutohet për ofertën, e më pas do vendoset.
“Kryeministri ofroi sjelljen e një kompanie serioze për rafinerinë dhe një pagë. Gjithçka do të diskutohet me kolegët nëse bihet dakord apo jo. Vendimin e marrin 900 naftëtarë. Ne keni një pikë të panegociueshme, kërkojmë pagat tona. Shteti nuk i merr përsipër, por premton rivendosjen në punë të rafinerisë dhe një pagë. Takim të dytë do të ketë kur të merret vendimi”, tha Dautaj. /tesheshi.com/
