“Në Kosovë e Shqipëri duhet të përgatitemi për një pranverë shqiptare…”, ishte një ndër frazat e thëna nga lideri i Vetëvendosjes Albin Kurti, shfaqur befas mes studentëve protestues te Fakulteti i Shkencave Sociale. Edhe pa qenë nevoja për spekullime të tipit “një prani e tij në folenë e marksistëve”, referuar një përcaktimi për këtë fakultet nga Ermal Hasimja, Kurti vetë shpalosi një frymë të qartë komuniste në gjithë kumtet e tij me studentët. Në ç’pikë? Te cenimi i rregullave të lojës. Një tipar i komunistëve është pikërisht ky: shmangia nga rregullat e lojës, pra revolucioni, pse jo dhe me armë, siç dhe ka ndodhur.
Ky qëndrim do i përligjej Albin Kurtit vetëm nëse do ishte në kushte parapolitike, pra pa hyrë në sistem. Ndërsa ai është në sistem prej më pak se 20 vjetësh. Është në sistem, por vepron kundër tij. Thirrja për “një pranverë shqiptare”, duhej të ishte një thirrje nga rruga por jo nga brenda sistemit ku ai ndodhet.
Ai nuk ka nevojë për “pranverë” se “pranverën” e ndryshimit e ka të garantuar me sistemin ku ai ndodhet, i cili i ka dhënë shansin që të garojë e fitojë, nëse është i aftë për sfida politike. Sistemi i dhuron “pranverën” e marrjes së pushtetit me garë, e më pas për ta ndërtuar një shtet a një shoqëri, sipas vizionit që ai beson e për të cilin lufton.
VV arriti të fitojë një komunë në Kosovë, më pas dy, e nuk ka “pranverë” më të madhe që të të jepet shansi me votë që të tregosh dy modele “pranverash” të aftësisë në politikat menaxheriale lokale, për të avancuar më pas në nivelin më të lartë, atë të marrjes së qeverisë qendrore. Pra, është një “pranverë” që ta jep sistemi, mjaft të ndjekësh rregullat e lojës.
Kjo nuk vlen vetëm në rastin e kumteve të tij te Shkencat Sociale, duke yshtur studentët për rebelim, por dhe për të gjithë stilin e politikëbërjes së tij, e cila ka çuar dhe në gjakderdhje e për fat të keq dhe në viktima.
Albin Kurti, o të kërkojë “pranverë” duke dalë jashtë sistemit, o nuk mund ta kërkojë atë duke qenë brenda sistemit, me thirrjen në metoda revolucionare, thënë ndryshe komuniste…/tesheshi.com/
