Nga Ylli Pata
Rusia ka nisur një lojë të fuqishme për të shkatërruar kryeministrin Aleksandër Vuçic dhe të krijojë një lob pushteti, ku të marrin pjesë presidenti Tomislav Nikoliç, ministri i Jashtëm Ivica Daçic dhe ish-kryeministri, aktualisht drejtues i Partisë Demokratike Serbe, ultranacionlisti Vojisllav Koshtunica.
Një nga mediat ruse më të rëndësishme që analizon situatat në Ballkan, përkatësisht Komersant shkruan mes rreshtave se Vuçiç ka tradhëtuar aleancën me Rusinë dhe po luan me Perëndimin.
Në Serbi pritet që Presidenti Nikoliç të dekretojë datën e zgjedhjeve të parakohshme parlametare, pasi mazhoranca ka kërkuar shkrirjen e parlamentit.
Partia në pushtet, SNS që ka në krye Vuçiç, por që është drejtuar nga Nikoliç përpara se ai të jepte dorëheqjen formale, është ndarë në dy pjesë: ithtarët e aleancës së vjetër me Rusinë, ku është një pjesë e madhe, si dhe reformatorët që synojnë të kapin elektoratin e qendrës në Serbi, i cili është gjithashtu i konsiderueshëm.
Por Moska nuk po i lë fare hapësirë veprimi Uashingtonit dhe Brukselit, të cilët po mbështesin forcat reformatore edhe në gjirin e ultranacionalistëve.
Komersant thekson se qeveria serbe po prish poitikën aktuale të neutralitetit duke u afruar shumë me NATO-n dhe bën të ditur se një marrëveshje e Vuçiç me Aleancën Veriatlanike pritet të hidhet poshtë nga kreu i shtetit, Tomislav Nikoliç.
Analisti serb Dragomir Andjelkoviç, thekson se ekzistojnë dy rryma në vend dhe ka një vullnet që synon marrëdhënie të barazlarguara siç vepronte dikur Tito në Jugosllavi.
Por qarqet ruse po mundohen të influencojnë zgjedhjet në mënyrë që të krijohet një lob i fortë anti-perëndimor që të ndalojë një afrim të Beogradit me NATO-n.
Përpara 12 vjetësh u tentua sërish kjo gjë kur kryeministër ishte Zoran Xhinxhiç, i cili fatkeqësisht u vra në një atentat të kryer nga një grup i lidhur me shërbimet sekrete.
Vetëm një muaj më pare, në Beograd ishte zv/kryeministri rus dimitri Rogozin, i cili bëri të ditur se Rusia do të furnizojë Serbinë me sisteme raketore ruse dhe avionë Mig 29.
Pas kthimit në Moskë, Rogozin shkroi një mesazh të koduar në twitter, ku tha se “Vuçiç duhet të gjejë varrin e stërgjyshit tim në Serbi”, që ishte një kërcënim i hapur me simbolikën e ekzistencës së influencës ruse në Serbi, që prej katër brezash. /tesheshi.com/
