Përzgjedhja e oficerëve të policisë që do të trajnohen nga FBI për tu bërë pjesë e Byrosë Kombëtare të Hetimit, do të kryhen sipas një procedure speciale, e cila i ngjan thuajse 100% testimit të Byrosë Federale të Hetimit në SHBA.
Siç mësohet nga burime pranë qeverisë, janë tre shkallë intensive të seleksionimit që do të ndiqen prej muajit të ardhshëm dhe do të supervizohen nga një officer i FBI-së i cili do të vijë në Tiranë.
Testimi
Faza e parë e testimit është një provim 3 orësh inteligjence, logjike dhe shpejtësie.
Më pas bëhet një vlerësim vetë-kontrolli që kryhet sipas një protokolli të caktuar dhe që nuk ndryshon.
Me marrjen e rezultateve të vetëkontrollit bëhet shkartisja e parë e grupit.
Ata që fitojnë, i nënshtrohen testit të gjuhës, që natyrisht do të bëhet si në gjuhën angleze, por edhe në gjuhën shqipe.
Ky provim do të bëhet në dy pjesë: 90 minuta me shkrim dhe 90 minuta me gojë që është një intervistë e plotë para një paneli ekspertësh.
Pas përfundimit të provimit të gjuhës nis testi fizik i stërvitjes (PFT).
Ai përfshin një numër ushtrimesh shumë të rënda që zhvillohen në palestër dhe janë të përfshira në protokollin e FBI-së.
Në radhë pas kalimit të testit fizik vjen poligrafi, apo prova e së vërtetës, ku me një mekanizëm që është shpikur herët, provohet aftësia për të thënë të vërtetën dhe për t’i shpëtuar makinës.
Paralel bëhet një hetim mbi të kaluarën e konkurentit dhe njëkohësisht ai kalon në testin e drogës dhe në një ekzaminim super të detajuar mjeksor.
Pasi përfundon kjo fazë, atëherë një ekip më i specializuar vlerëson aftësitë e kandidatëve sipas një renditje të përcaktuar sipas kësaj renditjeje:
- Vetitë e drejtuesit.
- Aftësi komunikuese.
- Shpirti i iniciativës dhe motivimi.
- Shkathësia dhe fleksibiliteti.
- Aftësi interpersonal.
- Zotësia në vlerësimin e situatës dhe marrja e vendimeve të duhura në kohën e duhur dhe vendin e duhur.
Paralelisht me testimin dhe stërvitjen kandidatët për tu regjistruar në “policinë antikorrupsion” që duhet të arrestojnë politikanët abuzues do të zgjidhen nga familje me integritet ndër breza që kanë dhënë prova që nuk korruptohen dhe joshen nga jeta e bukur.
Madje një nga pjesët e testimit është edhe ‘karremi” për jetën luksoze, e cila i bëhet edhe kandidatëve për tu pranuar si agjente special të FBI-së amerikane.
Siç mësohet, në sitë do të kalojnë një numër i madh kandidatësh që kanë kryer arsimin e lartë në tre fusha kryesore: informatikë, financë dhe Akademi Policie.
Në fillim ishte plani që të merreshin edhe kandidatë që kanë kryer shkollën për drejtësi, por më pas, ky version ka rënë rrugës për disa shkaqe.
Marrëveshja kuadër mes Ministrisë së Brendshme të Shqipërisë dhe FBI-së amerikane u firmos të enjten e shkuar në Uashington mes ministrit Saimir Tahiri dhe kreut të FBI-së: James Comey.
/tesheshi.com/
