Do mjaftonte përzgjedhja e një emri si Robert Rakipllari për të qenë përballë kryeministrit Rama në A2 CNN, për të mos e ndjekur paraqitjen e tij të radhës mediale në një studio televizive.
Mbetet një pikëpyetje e madhe në median shqiptare, mes shumë e shumë të tillave, me theks profesionalizmin në gazetari, ajo se ç’të veçanta profesionale gazetareske ofron i ashtuquajturi analist Rakipllari, vite në gazetari si shef redaksish, por pa asnjë produkt të mirëfilltë gazetaresk me emrin e tij, aq më pak me ndonjë analizë tërheqëse. Madje mban rekordin e asnjë shkrimi me firmën e tij – analizë, opinion apo reportazh – që nga viti i largët 2000. Nga të tillë në media, i ndjeri Fatos Baxhaku kishte një përvuajtje të thellë profesionale. Dhe është e qartë tashmë se ato paraqitje të Ramës kur përballë është Rakipllari, janë një torturë e vërtetë për atë që i ndjek. Tortura konsiston në faktin se dihet se ç’pyetje do bëhen, dihet se ç’përgjigje do jipen, dihet se ç’replika do ketë. Kështu ndodhi dhe mbrëmjen e së mërkurës në A2 CNN, pa asnjë befasi, pasi ç’lloj lajmi buroi prej asaj interviste pothuajse është i konsumuar si lajm.
Në një titull të kësaj mediaje ku potencohet rëndësia e intervistës, pretendohet se aty Ramës iu bënë “të gjitha pyetjet” që shqetësojnë opinionin publik. Në fakt vetëm kjo nuk ndodhi. Mungesa e modestisë në një pretendim kaq madhor tregon dhe mungesën e profesionalizmit në hartimin e pyetjeve, si në formulim e si në tematikë, duke qenë në nivele krejtësisht parazite prej stërkonsumimit. Se ja, mjafton një pyetje që nuk u bë e duhet të bëhet ndaj Ramës, ajo e një dritëhijeje në raportet me partnerin dhe mikun e tij më të ngushtë në raportet me liderët botërorë, Erdogan. Prej kohësh, nuk ka asnjë lajm mbi vijimin e marrëdhënies së ngushtë mes tyre, nga e cila Rama shkonte e vinte në Turqi me një intensitet të pazakontë, duke potencuar në çdo rast afërsinë dhe miqësinë jo të zakontë me presidentin turk, një figurë përcaktuese tashmë në zhvillimet botërore. Mes tyre tashmë është futur si pykë gjeopolitike Lindja e Mesme, më saktë Izraeli dhe Palestina, ajo që ndau dikur Erdoganin me Berishën, edhe pse raporti i dikurshëm mes tyre nuk krahasohet me këtë të dhjetë viteve në pushtet të Ramës, mes këtij të fundit dhe liderit turk.
Siç është parë, Rama ka bërë deklarime dhe ka mbajtur qëndrime të tipit “më katolik se Papa” në përkrahje të Izraelit, duke mos treguar asnjë vetëpërmbajtje qoftë dhe etike, diktuar nga faktori Turqi, një vend që i është bërë suport i qeverisjes së tij në shumë drejtime, ashtu siç vendet arabe. E gjitha kjo ka ndodhur duke mos patur prej kohësh në sfond asnjë komunikim publik të kryeministrit shqiptar me presidentin turk apo takim mes tyre. Pra, ja një çështje që duhej të ishte në fokusin e pyetjeve ndaj Ramës, e munguar tërësisht, aq më tepër kur është fjala për aspekte të nxehta gjeopolitike në një botë që po ndryshon dhe që një luftë tjetër botërore i rri mbi kokë. Sigurisht që analisti i famshëm Rakipllari s’u përgjigjet dot këtyre niveleve me “pyetjet e frikshme” që artikulon, por A2 CNN, meqë mban peshën e rëndë të të qënit filial i një media hijerëndë, duhej të kishte në listën e “sfidimit” të kryeministrit. /tesheshi.com/
