Presidenti rus Vladimir Putin nënshkroi dekretet për shkarkimin e kreut të agjencisë ruse të hapësirës (Roscosmos) Dmitry Rogozin, postin e të cilit do ta marrë Yuri Borisov, i cili largohet nga posti i zv/kryeministrit.
Ky shkëmbim rolesh u parashikua nga mediat ruse, pasi të martën mbrëma tre gazeta, Kommersant, Vedomosti dhe RBK kishin shkruar në të njëjtën kohë se Yuri Borisov do të largohet nga posti i zv/kryeministrit dhe synohet për postin e Rogozinit.
Në çfarë pozicioni do të vendoset Rogozin ende nuk është bërë e ditur, shkruan shërbimi rus i BBC-së, duke theksuar se në uebsajtin Medusa shkruhej se ai duhet të punësohet në Kremlin në të ardhmen e afërt, por se çfarë pozicioni do të marrë është diçka që ende nuk dihet.
65-vjeçari Yuri Borisov zë vendin e 58-vjeçarit Dmitry Rogozin për herë të dytë. Në maj të 2018-ës ai e kishte zëvendësuar duke marrë postin e zv/kryeministrit. Para se të merrte postin e zv/kryeministrit, ai ishte zv/ministër i Mbrojtjes (që nga viti 2012) dhe më parë drejtoi komitetin qeveritar përgjegjës për industrinë ushtarake.
Rogozin, i cili i la vendin Borisovit, ishte bërë i njohur për shprehjet e tij të ashpra, kryesisht në faqen e tij në Twitter, e cila më vonë u bë llogaria zyrtare e agjencisë ruse hapësinore (Roscosmos) që përmbante më shumë informacione zyrtare.
Rogozin është përplasur vazhdimisht me biznesmenin amerikan Elon Musk, i cili ka nisur programin e tij hapësinor.
Retorika e tij, si ajo e liderëve të tjerë rusë, është ngurtësuar që nga fillimi i pushtimit rus të Ukrainës. Ndër deklaratat e tij më të fundit, më 12 Prill (kur media njoftoi se Borisov do të zinte vendin e tij), Rogozin udhëzoi kozmonautët në Stacionin Ndërkombëtar të Hapësirës (ISS) të ndalonin së punuari me ESA evropiane.
Duke cituar burimet e veta, faqja e internetit Meduza pretendoi se Rogozin po konsiderohej si një nga komisionerët e Kremlinit në “Republikat Popullore” të vetëshpallura të Donbasit, të njohura me urdhër të Putinit përpara pushtimit rus të Ukrainës. Në këtë rast, atij do t’i caktohet posti i këshilltarit presidencial ose nën/kryetari i administratës presidenciale, i cili aktualisht mbahet nga Dmitry Kozak.
Nën/kryetari i parë i administratës presidenciale, Sergei Kiriyenko, tani udhëton rregullisht në pjesët e okupuara të Ukrainës. Pas 24 shkurtit, Kozak ka mbetur jashtë fushës.
Burimet e Meduza-s thonë se Rogozin është “për presidentin”. “Presidenti e do atë dhe e ka dashur atë për një kohë të gjatë,” tha një nga burimet.
Me një dekret të veçantë, presidenti rus vendosi ministrin e Tregtisë dhe Industrisë Denis Madurov në postin e zv/kryeministrit Yuri Borisov. /tesheshi.com/
