Presidenti rus ka folur sot në një konferencë në Sochi, ku ka deklaruar se Perëndimi po i përdor disa prej grupeve rebele në Siri si gurë shahu për t’ia përshtatur axhendës së tyre më të gjerë në Lindjen e Mesme. Putin i ka akuzuar qeveritë perëndimore për standarde të dyfishta në mbështetjen e tyre për opozitën siriane.
“Le të mos luajmë me fjalët dhe t’i ndajmë terroristët në të moderuar dhe në jo të moderuar,” ka thënë ai.
“Do të doja ta kuptoja se ku është ndryshimi. Mbase disa ekspertë besojnë se banditët e moderuar ua presin kokat njerëzve në një numër më të moderuar apo në një mënyrë më të butë,” është shprehur Putin me ironi.
Këto deklaratë të Putinit erdhën para takimit të sotëm të katër kryediplomatëve të Rusisë, SHBA-ve, Turqisë dhe Arabisë Saudite në Vjenë, ku temë e diskutimeve është kriza siriane.
Më herët këtë javë ka patur një vizitë të papritur të Beshar Esadit në Moskë, e para e tij jashtë vendit që prej nisjes së revoltës në Siri. Rusia është aleati kryesor i Beshar Esadit, pa ndihmën e së cilës ky i fundit nuk do të mundej të rezistonte kaq gjatë. /tesheshi.com/
