Zëdhënësi i Kremlinit ka pohuar sot se në nisje të gushtit do të ketë një takim kokë më kokë të presidentit rus dhe atij turk. Ky do të jetë takimi i parë i tyre që prej shkrirjes së akujve midis dy vendeve.
Dmitry Peskov konfirmoi se Putini do ta presë homologun turk në Rusi në dhjetëditëshin e parë të muajit të ardhshëm.
“Takimi i Putinit dhe Erdoganit po negociohet përmes kanaleve diplomatike. Ata kanë një marrëveshje; takimi do të zhvillohet në dhjetë ditët e para të gushtit në Rusi. Qyteti dhe data e saktë janë duke u vendosur tani,” ka bërë të njohur Peskov.
Ai në të njëjtën kohë i ka mohuar zërat për një takim të dy udhëheqësve në Baku më 9 gusht. “Kjo nuk është e vërtetë. Në Baku do të ketë një takim trepalësh të presidentëve të Rusisë, Azerbajxhanit dhe Iranit.”
Një bisedë telefonike mes Putinit dhe Erdoganit javë më parë i hapi rrugën nisjes së përmirësimit të marrëdhënieve ruso-turke, të prishura keqas pas rrëzimit nga forcat ushtarake turke të një avioni luftarak rus nëntorin e 2015-tës. /tesheshi.com/
