Presidenti rus Vladimir Putin ka vendosur një anije luftarake të tipit fregatë të armatosur me raketa lundrimi hipersonike për të operuar në Oqeanin Atlantik dhe Indian dhe thuhet se është një demonstrim i forcës ushtarake ndërkohë që lufta në Ukrainë vazhdon.
Putin ndoqi ceremoninë e nisjes së anijes luftarake Admiral Gorshkov përmes videokonferencës të mërkurën. Ministri rus i Mbrojtjes Sergei Shoigu dhe komandanti i fregatës Igor Krohmal gjithashtu morën pjesë në ceremoni, sipas agjencive.
“Anija është e pajisur me sistemin më të fundit raketor hipersonik Zircon, i cili nuk ka asnjë konkurrent. Unë do të doja t’i uroj ekuipazhit të anijes suksese në shërbimin e tyre për të mirën e Atdheut”, tha Putin përpara se të jepte urdhrin për vendosjen e fregatës.
Shoigu tha se anija do të lundrojë nëpër oqeanet Atlantik dhe Indian, dhe Detin Mesdhe. Ai shtoi se Admirali Gorshkov është në gjendje të kryejë “goditje të sakta dhe të fuqishme ndaj armikut në det dhe në tokë“, si dhe se raketat hipersonike që ato mbajnë mund të kapërcejnë të gjitha sistemet antiraketë dhe të kenë një rreze veprimi prej më shumë se 1000 kilometrash.
Manovrimi si tipar kryesor
Raketat hipersonike mund të zhvillojnë pesë herë shpejtësinë e zërit. Rusia testoi Zircon nga luftanijet dhe nëndetëset vitin e kaluar, gjatë një gare për zhvillimin e armës në të cilën Shtetet e Bashkuara dhe Kina janë ende duke marrë pjesë.
“Fokusi kryesor i misionit është kundërshtimi i kërcënimeve ndaj Rusisë dhe mbështetja e paqes dhe stabilitetit rajonal së bashku me vendet mike”, tha Shojgu.
Pavarësisht emrit të tyre, analistët theksojnë se karakteristika kryesore e raketave hipersonike nuk është shpejtësia e tyre – e cila ndonjëherë mund të arrihet ose tejkalohet nga raketat tradicionale balistike – por aftësia e tyre për të manovruar.
Këto raketa konsiderohen si një lloj avantazhi kundër armikut pasi mund të shmangin pengesat e mundshme, sistemet e mbrojtjes dhe sistemet e paralajmërimit të hershëm. /tesheshi.com/
