Vladimir Puin i shkruan kroatëve, armiqve të miqve të tij serbë, që të ndërtojnë një aeroplanmbajtëse për flotën detare ruse.
E përditshmja e Splitit, Slloboda Dalmacija, bën të ditur se kantieri detar kroat, “Brodosplit” ka marrë një kërkesë të fuqishme nga ana gjeopolitike.
Madje një skuadër e kësaj kompanie ka mbërritur në Rusi për t’u njohur me standartet dhe kërkesat e marinës ruse.
Rusia aktualisht nuk i ka kapacitetet e duhura njerëzore dhe teknologjike për të ndërtuar mjete lundruese që mbajnë avionë apo helikopterë.
Me këtë letër, që është jashtëzakonisht e shkurtër, janë njohur edhe disa ministra të qeverisë kroate. Letra çuditërisht është dërguar në departamentin e shitjes së kompanisë “Brodosplit”.
Josip Jurisiç, një zëdhënës i Bordit të “Brodosplit”-it, ka konfirmuar ekzistencën e letrës por nuk kanë dhënë komente të mëtejshme.
Ndërkaq, mediat kroate bëjnë të ditur se kërkesa të tilla i kanë shkuar edhe kompanive të tjera europiane.
Francezët kanë ndërtuar dy helikopter-mbajtëse: luftanijet “Vladivostok” dhe “Sevastopol”, por ata nuk janë dorëzuar ende për shkak të sanksioneve të BE-së pas agresionit rus kundër Ukrainës.
Por nga ana tjetër biznesi është biznes dhe Parisi i ka paguar Moskës 1 miliard euro dëmshpërblim për vonesën e dorëzimit të anijeve. E. Hoxha – /tesheshi.com/
