Presidenti rus Vladimir Putin dhe lideri bjellorus Aleksandër Lukashenko kanë rënë dakord që Moska do të tërheqë rezervën ushtarake të vendosur në kufirin me Bjellorusinë, tha një zëdhënës i Kremlinit, raportoi TASS.
Putin dhe Lukashenko u takuan në vendpushimin rus të Soçit, ku Lukashenko erdhi për mbështetje, pasi ai përballet me protesta masive që filluan pas zgjedhjeve presidenciale të 9 gushtit, për të cilat opozita pretendon se ishin të manipuluara.
“Një rezultat i rëndësishëm i bisedimeve midis dy presidentëve në Soçi është një marrëveshje që Rusia tërheq rezervën e anëtarëve të forcave të sigurisë dhe Gardës Kombëtare, të cilat ishin vendosur pranë kufirit ruso-bjellorus dhe tërheq njerëzit në bazat e përhershme,” tha Dmitry Peskov.
Kredi ruse për Bjellorusinë
Më parë, u njoftua se Rusia synon t’i sigurojë Bjellorusisë një hua shtetërore prej 1.5 miliardë dollarësh. Kjo u konfirmua të hënën nga Presidenti rus Vladimir Putin në një takim me Lukashenkon.
Putini kujtoi se kryeministri rus Mikhail Mishustin më parë kishte zhvilluar bisedime të suksesshme në Minsk në të gjitha fushat e bashkëpunimit midis dy vendeve, duke përfshirë dhe atë financiar.
Ai tha se pret që informacioni në lidhje me kredinë të pasqyrohet në tregun financiar.
Bashkimi Evropian vendosi sanksione ndaj disa diplomatëve bjellorusë pasi policia arrestoi qindra mijëra demonstrues që kundërshtojnë mandatin e gjashtë presidencial të Aleksandër Lukashenkos. Presidenti bjellorus i akuzoi protestuesit për shkaktim të çrregullimeve në vend, ndërsa akuzoi vendet perëndimore për nxitje të protestave. /tesheshi.com/
