“Rusia do të vazhdojë të mbështesë edukimin islam, i cili luan një rol kyç në trajtimin e ideve shkatërruese të përhapura midis të rinjve muslimanë në vend”, tha Presidenti Vladimir Putin.
Autoritetet ruse do të “mbështesin patjetër” edukimin islam nëpërmjet “universiteteve të mëdha shtetërore” dhe mjete të tjera, tha presidenti gjatë një takimi me klerin më të lartë mysliman të vendit në Kazan të mërkurën.
“Roli i edukimit musliman midis të rinjve është i rëndësishëm, pasi ka shumë probleme dhe ide të dëmshme në këtë fushë”, tha Putin. Grupet radikale si Shteti Islamik (IS, ish ISIS) po punojnë për të përhapur ideologjinë e tyre dhe për të rekrutuar anëtarë të rinj në mesin e të rinjve në rajonet myslimane të Rusisë.
“Këto ide, madje edhe ato shkatërruese, mund të trajtohen vetëm në një mënyrë, nëpërmjet ideve të tjera. Ato, që po promovohen dhe u mësohen njerëzve në Akademinë Teologjike, e cila u krijua këtu (në Kazan) dhe në akademi dhe institucione të tjera arsimore … në Moskë, Ufa dhe Kaukaz”, tha ai.
Gjatë takimit, Putin theksoi se “Islami tradicional është një pjesë e rëndësishme e kodit kulturor të Rusisë dhe se bashkësia muslimane është pa dyshim një pjesë shumë e rëndësishme e popullsisë shumëkombëshe ruse”. Sipas regjistrimit të vitit 2002, Rusia kishte 14.5 milionë muslimanë, e cila përbën rreth 10 përqind të popullsisë.
Putin gjithashtu vlerësoi organizatat muslimane ruse për punën e tyre në nivel ndërkombëtar. “Unë mendoj se kjo është një fushë shumë interesante e aktivitetit dhe shumë legjitime”, tha ai.
Ndër të tjera, organizatat muslimane ruse organizojnë Forumin vjetor ndërkombëtar musliman, i cili bashkon udhëheqësit muslimanë nga Evropa dhe vende të tjera. “Ata na dëgjojnë; ata shohin se si ne zhvillohemi; sa të mira janë marrëdhëniet e muslimanëve rusë me autoritetet e vendit dhe sa jemi të mbështetur nga presidenti ynë”, tha Muftiu i Madh rus, Ravil Gainutdin.
Sipas Gainutdin, “muslimanët rusë janë një lloj fuqie e butë në promovimin e modelit tonë të zhvillimit të shoqërisë civile … Kohët e fundit kam pranuar ambasadorin amerikan, pastaj homologun e tij nga Spanja. Ne nuk jemi politikanë dhe diplomatë, por kemi diplomacinë e popullit tonë, ne flasim me ta, duke i kthyer ata në anën tonë”. /tesheshi.com/
