Presidenti Rexhep Tajip Erdoan është takuar me Presidentin e Rusisë, Vladimir Putin në Baku, ku të dy kishin shkuar për të marrë pjesë në ceremoninë e hapjes së Lojërave Evropiane.
Në këtë takim Erdoan shoqërohej nga Ministri i Punëve të Jashtme Mevlut Çavushollu, Ministri i Energjetikës dhe Burimeve Natyrore Taner Yildiz, Ndihmëssekretari i Përgjithshëm i Presidencës Ibrahim Kalin, ish-Ministri i Transportit, Detarisë dhe Komunikacionit Binali Yildirim, kurse Putin shoqërohej nga Ministri i Punëve të Jashtme të Federatës së Rusisë Sergej Lavrov.
Në deklaratat që bëri para këtij takimi Presidenti Erdoan tha se Lojërat Evropiane morën start me një ceremoni të bukur dhe se Azerbajxhani kishte bërë një investim serioz për këtë organizim.
Duke rikujtuar që organizimi mbante emrin “Lojërat Evropiane”, Erdoan vuri në dukje mungesën e liderëve të vendeve evropianë në ceremoninë e hapjes së lojërave. “Në fakt emrin e kanë Lojërat Evropiane, por nuk pashë liderë të vendeve anëtare të Bashkimit Evropian”, cilësoi Erdoan.
Sportistët e vendeve të BE-së kanë marrë pjesë në këto lojëra, pavarësisht mungesës së liderëve të tyre, tha Presidenti Erdoan.
Edhe Kryetari i Federatës së Rusisë, Vladimir Putin tha se ceremonia e hapjes ishte një organizim dinamik dhe i bukur.
Në lidhje me kritikën e Erdoanit për mungesën e liderëve të BE-së në këtë organizim sportiv Putin tha: “Turqia ndodhet këtu në Baku, si anëtare përfaqësuese e BE-së”. Në përgjigje të kësaj Presidenti Erdoan tha se “Turqia nuk është anëtare e Bashkimit Evropian, por një vend që vazhdon negociatat e anëtarësimit”.
