Presidenti rus ka folur për rrjetin informativ Bloomberg në Forumin Ekonomik Lindor, duke prekur çështjen e ndërhyrjeve nga jashtë në vende të ndryshme për t’i demokratizuar ato. Putin i ka thënë Bloomberg-ut se ngjarjet e dekadës së shkuar kanë treguar se përpjekjet e jashtme për demokratizimin e një vendi çojnë në shkatërrimin e shtetit dhe në lindjen e terrorizmit.
“Gjithmonë kam qenë i mendimit se nuk mund t’i ndryshoni gjërat nga jashtë në lidhje me regjimet politike, me ndryshimin e pushtetit,” raporton Russia Today të ketë thënë Putin.
“Ne e shohim ku çuan në veçanti përpjekjet për demokratizim në Irak e Libi: në shkatërrimin e sistemit shtetëror dhe në lindjen e terrorizmit.”
Shefi i Kremlinit ka sjellë në vëmendje: “A shihni ndonjë element demokracie në Libi? Mbase do të zhvillohen një ditë! Apo në luftën civile në Irak; cila është e ardhmja e Irakut në përgjithësi?”
“E njëjta gjë vlen për Sirinë. Çdo herë që dëgjojmë, ‘Esadi duhet të largohet’,” ka thënë Putin, “veç vras mendjen, ku do të çojë kjo?”
Duke vijuar, “A nuk është më mirë të pajisemi me durim dhe të nxisim ndryshime strukturore në shoqëri, të presim që këto ndryshime të ngjasin natyralisht?”
Vladimir Putin ka kujtuar se, “Kjo nuk do të ngjasë sot apo nesër, por mbase këtu gjendet urtësia politike: të përmbahesh e të mos kërcesh, por të kërkosh gradualisht ndryshime strukturore, në këtë rast, në sistemin politik të shoqërisë.” /tesheshi.com/
