Presidenti rus, Vladimir Putin ka thënë të premten se Rusia mund të lëvizë trupat e saj në kufirin finlandezo-rus, në rast se Finlanda vendos t’i bashkohet NATO-s. Krahas këtij paralajmërimi, kreu i Kremlinit bëri thirrje për parandalimin e çfarëdo konflikti në rajonin baltik.
“Forcat e armatosura finlandeze mund të bëhen pjesë e infrastrukturës ushtarake të NATO-s, e cila brenda natës mund të gjendet në kufijtë me Federatën Ruse”, tha Putin pas një takimi me presidentin finlandez Sauli Niinisto.
“A me të vërtetë mendoni se do të qëndrojmë kështu si jemi, me trupat tona 1,500 km larg kufirit?!”, ka pyetur Putin në mënyrë retorike, duke dhënë mesazhin se do veprojë në çdo rast.
Vizita e parë e Putinit në Finlandë pas shpërthimit të krizës në Ukrainë në vitin 2014, vjen në kohën kur janë rritur aktivitetet e Rusisë dhe të NATO-s në rajonin e Baltikut, me Finlandën ushtarakisht neutral, si dhe me Suedinë fqinje e cila ka shtuar bashkëpunimin e saj me NATO në Varshavë. /tesheshi.com/
