Presidenti rus Vladimir Putin tha në një intervistë për NBC News, përpara një takimi me homologun oe Biden javën e ardhshme, se marrëdhëniet ruso-amerikane janë në pikën e tyre më të ulët në vitet e fundit.
Putin dhe Biden do të takohen të mërkurën në Gjenevë. Shtëpia e Bardhë njoftoi se Biden do të vendosë në rendin e ditës çështjen e sulmeve të hakerëve që vijnë nga Rusia, agresionin e Moskës ndaj Ukrainës, burgosjen e disidentëve dhe çështje të tjera që kërcënojnë këto marrëdhënie.
“Ne kemi marrëdhënie dypalëshe që janë përkeqësuar në nivelin më të ulët në vitet e fundit,” tha Putin.
Putini vlerësoi ish-Presidentin Donald Trump si një “individ të jashtëzakonshëm, të talentuar” dhe tha se Biden, një politikan në karrierë, ishte “e kundërta e plotë” e Trump.
I pyetur për të komentuar deklaratën e Biden në mars, në të cilën ai e quajti atë një vrasës, Putini u përgjigj se ai kishte dëgjuar dhjetra akuza të tilla. “Nuk është diçka që në fund të fundit më shqetëson”, tha ai.
Në fillim të vizitës së tij tetë-ditore në Evropë, Biden tha se Shtetet e Bashkuara “nuk po kërkonin një konflikt me Rusinë”.
“Ne duam një marrëdhënie të qëndrueshme dhe të parashikueshme … por unë isha i qartë: Shtetet e Bashkuara do të përgjigjen në një mënyrë të fuqishme dhe kuptimplote nëse qeveria ruse fillon aktivitete të dëmshme.”
NBC News deklaron se Putini mohoi që ai të kishte ndonjë informacion në lidhje me ndonjë sulm hakeri nga Rusia dhe se ai i bëri thirrje Biden-it të përfundonte një marrëveshje në lidhje me kibernetikën.
Putin gjithashtu hodhi poshtë pretendimet e Washington Post se Rusia po përgatitej të furnizonte Iranin me një satelit të përparuar që do të lejonte gjurmimin e objektivave të mundshëm ushtarakë në Lindjen e Mesme. Ai pohoi se ato ishin “lajme të rreme” dhe se ai nuk dinte asgjë për to. /tesheshi.com/
