Romani “1984” i George Orwell-it, një vepër futuriste për sundimtarët totalitarë të cilët “shpëlajnë trurin” e qytetarëve për të siguruar mbështetjen e tyre për luftëra të pakuptimta, është në krye të librave më të shitur në Rusi, raportoi Reuters, duke cituar të dhëna nga libraritë ruse.
Romani i shkrimtarit britanik u botua në vitin 1949, menjëherë pas rënies së nazizmit në Evropë, fillimit të Luftës së Ftohtë dhe lindjes së bllokut komunist sovjetik të udhëhequr nga Stalini. Libri u ndalua në Bashkimin Sovjetik deri në vitin 1988, kujton Reuters.
Orwell tha dikur se ishte diktatura e Stalinit që i shërbeu atij si një model për këtë libër.
Reuters thotë se “disa shohin jehonë bashkëkohore në qeverisjen e presidentit rus Vladimir Putin, i cili zhduki opozitën politike dhe mediat kritike nga sfera publike gjatë dy dekadave të tij në pushtet, si dhe rehabilitoi kujtesën e Stalinit”.
Pushtimi i Putinit në Ukrainë në shkurt çoi në ligje të reja që e bëjnë krim publikimin e çdo informacioni rreth luftës i cili bie në kundërshtim me deklaratat zyrtare, sipas Reuters, duke vënë në dukje se Kremlini shmang vetë fjalën “luftë”, duke përdorur në vend të saj gjetjen e Putinit – “operacion ushtarak”. /tesheshi.com/
