Presidenti rus gjendet sot në kryeqytetin e Iranit, në të parën vizitë të tij në tetë vjet në këtë vend. Vladimir Putin po e viziton Teheranin në kuadër të takimit të Forumit të Vendeve Eksportuese të Gazit, por pjesë e axhendës së tij janë dhe takimet me presidentin iranian Hasan Ruhani, si dhe me udhëheqësin suprem, Ali Hamenein.
Siç bën të ditur zëdhënësi i presidentit rus, tema e diskutimeve me udhëheqësit iranianë është e gjerë, nga bashkëpunimi tregtar dhe në investime te energjia bërthamore, te nafta dhe gazi. Thelbësor është shkëmbimi i mendimeve mbi krizën siriane dhe zgjidhjen e saj, mbi luftën kundër terrorizmit, si dhe mbi vënien në zbatim të planit të përbashkët të veprimit mbi programin bërthamor të Iranit.
Si finalizim i parë i vizitës së Vladimir Putinit në Teheran është nënshkrimi prej tij i një dekreti që e heq ndalimin e furnizimit të Iranit me pajisje të pasurimit të uraniumit. Sipas faqes zyrtare të qeverisë ruse, ky vendim është i lidhur me importimin e uraniumit të pasuruar nga Irani.
Rusia dhe Irani janë të vënë hapur në krah të regjimit të Beshar Esadit në Siri, dhe e kanë mbështetur atë që në ditët e para të rebelimit kundër tij. Forcat ajrore ruse kanë nisur prej javësh dhe bombardimin e pozicioneve rebele, me ç’rast dhe ushtria e Esadit po kryen një ofensivë në shkallë të gjerë. /tesheshi.com/
