Presidenti rus, Vladimir Putin, ka folur në Forumin Ndërkombëtar Ekonomik në Shën Petërsburg, ku ka thënë se Perëndimi e mbështeti grushtin e shtetit në Ukrainë për të përligjur ekzistencën e NATO-s.
“…opozita [ukrainase] që është në pushtet sot do ta kishte shumë të mundshme të vinte në pushtet me mjete demokratike, përmes zgjedhjeve. Ne do të kishim punuar me ta ashtu siç punuam me autoritetet përpara,” kanë qenë fjalët e Putin-it në mbështetje të tezës së tij.
“Jo, ata do ta merrnin atë nëpërmjet grushtit të shtetit, me viktima, për të shkaktuar gjakderdhje, luftë civile, për ta frikësuar popullsinë rusishtfolëse në juglindje të Ukrainës dhe në Krime.”
Shefi i Kremlinit është shprehur se Perëndimi vazhdoi ta çonte më tej këtë spirale, për ta përshkallëzuar. Veprime të tilla, ka qenë i opinionit ai, janë diktuar nga nevoja për të përligjur pikërisht ekzistencën e NATO-s.
“Ata kanë nevojë për një armik të jashtëm, për një kundërshtar të jashtëm, ndryshe pse do të nevojitej kjo organizatë?”
Nëse ne vazhdojmë të veprojmë në kuadër të kësaj logjike, përshkallëzimi dhe shtimi përpjekjesh për ta frikësuar njëri-tjetrin, shpejt do të vijmë te Lufta e Ftohtë,” ka konkluduar Putin. /tesheshi.com/
