Në fjalimin e tij të përvitshëm nga Kremlini me anë të të cilit presidenti Putin i drejtohet parlamentit dhe kombit rus, duartrokitjet më të mëdha çuditërisht i morri për ndërhyrjen në Siri, konkretisht në Halep, aty ku po shkruhet një ndër tragjeditë më të mëdha njerëzore në histori.
Kjo pasi ai vlerësoi trupat ruse që i kanë dalë në krah Assadit, siç tha, për të mundur rebelët.
Më tej Putin paralajmëroi se çdo përpjekje për të thyer barazinë strategjike do të ishte një katastrofë globale.
Sa për zgjedhjen e Donald Trumpit si president i SHBA, kreu i Kremlinit tha se vendi i tij është i gatsham të punojë me administratën e re amerikane në luftën kundër terrorizmit. “Sigurisht që dua të mbështetem në përpjekjet e përbashkëta me SHBA-të për të luftuar realisht kërcënimet; por jo ato të fabrikuara që vijnë nga terrorizmi ndërkombëtar”, tha Putin.
Megjithatë, ai theksoi se Rusia nuk kërkon të bëjë armiq në botë. “Ndryshe nga disa kolegë të huaj të cilët e shohin Rusinë si armike, ne nuk synojmë dhe nuk e kemi bërë kurrë që të krijojmë armiq. Ne kemi nevojë për miq. Por ne nuk do të lejojmë kurrë që të preken apo të dëmtohen interesat tona”, shtoi më tej Putin. /tesheshi.com/
