Ndërkohë që nën urdhërat e tij avionët rusë po bombardojnë shkolla dhe kopshte dhe po djegin fëmijë të pafajshëm me fosfor të bardhë në Halep, presidenti rus Vladimir Putin ka gjetur kohë të mbajë ligjërata morali për lirinë e shprehjes dhe ku duhet vënë kufiri këtyre të drejtave.
Fjala është për paralajmërimin që kreu i Kremlinit u bëri artistëve rusë për “sjellje tejet të rrezikshme” dhe u bëri thirrje atyre “që të mos nxisin ndarje në shoqëri” duke shkelur kufijtë e fjalës së lirë, si rasti me revistën franceze “Charlie Hebdo”.
“Gjithmonë ekziston një kufi i brishtë në mes të asaj që unë e quaj sjellje jashtëzakonisht e rrezikshme dhe lirisë së shprehjes,” tha dje Putin në një takim të Këshillit Konsultativ për Art dhe Kulturë. Ai përmendi shembullin e revistës satirike franceze “Charlie Hebdo”, e cila dy vjet më parë ishte objektiv i një sulmi ku humbën jetën 12 njerëz. “Pyetja është nëse këta karikaturistë kanë pasur nevojë të ofendojnë besimtarët muslimanë? Ndoshta ata nuk kanë dashur të fyejnë askënd, por ata ama e kanë bërë këtë” tha Putin.
Presidenti rus reagoi në këtë mënyrë ndaj deklaratës së aktorit popullor, Yevgeny Mironov i cili u ankua para tij se aktivistët dhe autoritetet konservatore kanë rritur presionin mbi lirinë e shprehjes artistike në Rusi. /tesheshi.com/
