Vladimir Putin i ka dhënë miratimin e tij të zhurmshëm kandidatit të avantazhuar republikan për Shtëpinë e Bardhë, Donald Trump, në një kohë që ky i fundit është kryqëzuar edhe nga të vetët në Amerikë. Duket se Putin i ka kthyer Trump-it komentet pozitive që ai ka shprehur për Rusinë.
“Ai është një person i shkëlqyer dhe i talentuar, nuk ka dyshim për këtë”, tha Putin, duke folur pas konferencës së përvitshme që mbajti në Moskë. “Ai është lideri absolut i garës presidenciale, si e dëshmojmë sot. Ai thotë se dëshiron të lëvizë në një tjetër nivel marrëdhëniesh, drejt marrëdhënieve më të thella me Rusinë. Si mund të mos e mirëpresim këtë. Sigurisht që e mirëpresim”, tha Putin.
Më herët, gjatë seancës së pyetje-përgjigjeve, presidenti rus u pyet se çfarë mendonte për garën presidenciale në Shtetet e Bashkuara. Putin u përgjigj duke thënë se ishte i gatshëm të punonte më këdo që do të zgjedhë populli amerikan.
“Ne nuk jemi vetëizoluar asnjëherë, pavarësisht se kush zgjidhet atje. Janë gjithnjë ata që përpiqen të “ndihmojnë” me atë që nevojitet të bëhet brenda vendit tonë, kush duhet të zgjidhet dhe kush nuk duhet, e në cilën mënyrë”, tha Putin. “Ne nuk e bëjmë kurrë këtë, asnjëherë nuk ndërhyjmë”.
Trump, i cili ka shkaktuar ndasi të mëdha gjatë këtij muaji kur apeloi që muslimanëve t’u ndalohet hyrja në SHBA, ka folur me shumë dashamirësi për Putinin gjatë fushatës.
“Ai nuk është si Barack Obama, fare. Ai nuk e respekton Obamën fare. Dhe jam i sigurtë se Obama nuk e pëlqen shumë atë”, tha Trump për Putinin në tetor. “Por, unë mendoj se do të shkoj shumë mirë me të. E nuk mendoj se ju do të keni këto lloj problemesh që keni aktualisht”, u tha ai njerëzve.
Trump gjithashtu, mbështeti përgjigjen e Putinit ndaj Turqisë me rastin e rrëzimit të avionit ushtarak rus, muajin e kaluar.
Edhe pse larg, duket se simpatia Trump-Putin nuk njeh kufij.
Përgatiti: Juli Prifti – /tesheshi.com/
