Presidenti rus, Vladimir Putin denoncoi Leninin dhe qeverinë e tij bolshevike për represion brutal e se ka vendosur një “bombë me sahat” nën shtetin rus.
Kriticizmi ndaj Leninit, që ende nderohet nga komunistët e shumë të tjerë në Rusi, është i pazakontë për presidentin rus, i cili në të kaluarën i ka peshuar me kujdes komentet për historinë kombëtare që të shmangë rrjedhjen e votave. Në të njëjtën kohë, pas kritikave, Putin sinjalizoi se qeveria nuk e ka ndër mend të zhvendosë trupin e Leninit nga mazoleumi në Sheshin e Kuq duke e përcjellë këtë synim me paralajmërimin “kundër hapave që sjellin ndasi në shoqëri”.
Vlerësimet e Putinit për rolin e Leninit në historinë ruse gjatë takimit që pati me aktivistë pro-Kremlinit në qytetin jugor të Stavropolit, gjithsesi kanë pasur qëndrime më negative sesa në të kaluarën. Ai denoncoi Leninin dhe qeverinë e tij për ekzekutimin e dhunshëm të carit të fundit të Rusisë dhe familjes së tij e shërbëtorëve, vrasjen e mijëra priftërinjve dhe se ka vendosur një bombë me sahat poshtë shtetit rus për shkak të hartimit të kufijve administrativë sipas ndarjeve etnike.
Si një shembull të trashëgimisë destruktive të Leninit, Putin tregoi rastin e Donbasit, rajonit industrial në lindje të Ukrainës ku nisi kryengritja e separatistëve prorusë disa javë pas aneksimit të Krimesë nga Rusia në mars të vitit 2014. Më shumë se 9 mijë persona janë vrarë që nga nisja e konfliktit në prill të atij viti dhe përplasjet vazhdojnë pavarësisht armëpushimit të shkurtit 2015.
Putin tha se qeveria e Leninit, çuditshëm kishte miratuar kufijtë midis zonave të Bashkimit Sovjetik, duke e vendosur Donbasin nën juridiksionin e Ukrainës në mënyrë që të rriste përqindjen e proletariatit në këtë zonë. Këtë veprim Putin e cilësoi delirant.
Kritikat e Putinit për Leninin mund të jenë pjesë e përpjekjeve të tij për të justifikuar politikën e Moskës në krizën e Ukrainës, por gjithashtu mund të reflektojnë shqetësimin e Kremlinit për ndjesi të mundshme separatiste në disa province ruse.
Putin u shfaq veçanërisht kritik ndaj konceptit të Leninit për një shtet federativ me entitete që kishin të drejtën të ndaheshin, duke thënë se kjo ka kontribuar më së shumti në shpërbërjen e vitit 1991 të Bashkimit Sovjetik. Ai shtoi se Lenini e kishte gabim në konfliktin që pati me Stalinin i cili ishte avokat i modelit të shtetit unik.
Në të kaluarën, Putini e ka denoncuar Stalinin për spastrimet që kreu nga të cilat u vranë miliona njerëz, por ka mbrojtur rolin e tij në mposhtjen e nazistëve gjatë luftës së dytë botërore.
Komentet e fundit të Putin përfshijnë edhe kritika ndaj bolshevikëve se shkaktuan mposhtjen e rëndë të Rusisë nga duart e gjermanëve gjatë luftës së parë botërore dhe se lëshuan pjesë të mëdha të territorit vetëm muaj pas kësaj humbjeje.
“Ne humbëm ndaj humbësve, një rast unik në histori”, tha Putin.
Presidenti rus tha se besonte me sinqeritet në ideologjinë komuniste kur shërbente në KGB, duke shtuar se premtimet e saj për një shoqëri të drejtë e të ndershme, i ngjasonin më tepër Biblës, pasi realiteti ishte shumë i ndryshëm. “Vendi ynë nuk i ngjante Qytetit të Diellit, si e imagjinonin socialistët utopistë”, tha ai.
Përgatiti: Juli Prifti – /tesheshi.com/
