Vendosja e sanksioneve perëndimore ndaj Moskës është si një shpallje lufte, tha të shtunën presidenti rus Vladimir Putin.
Duke folur në një takim me vajza të punësuara nga disa linja ajrore ruse përpara Ditës Ndërkombëtare të Gruas më 8 Mars, Putin tha: “Pjesa më e madhe e asaj që po ndodh, ajo që po përballemi, janë mënyrat për të luftuar Rusinë. Sanksionet që po vendosen janë të ngjashme me një shpallje lufte, por, falë Zotit, kjo nuk ka ndodhur ende”.
Putin kërcënoi gjithashtu se çdo përpjekje për të vendosur një zonë ndalim-fluturimi mbi Ukrainë do të ishte bashkim me konfliktin.
“Tani dëgjojmë se është e nevojshme të vendoset një zonë ndalim-fluturimi mbi territorin e Ukrainës. Është e pamundur të bëhet në territorin e vetë Ukrainës, është e mundur vetëm në territorin e disa vendeve fqinje. Por ne do të shqyrtojmë çdo lëvizje në këtë drejtim. Ne do t’i konsiderojmë menjëherë pjesëmarrës në konfliktin ushtarak…”, tha ai.
Putin përsëriti se Rusia nuk mund të “kalojë” thjesht deklaratat e zyrtarëve ukrainas për synimet e tyre për të zhvilluar armë bërthamore, duke thënë se fqinji i tyre mund të bëhet shpejt një fuqi bërthamore me një trashëgimi sovjetike dhe ndihmën e Perëndimit.
“Ukraina ka pasur aftësi bërthamore që nga koha sovjetike. Dhe sa i përket pasurimit dhe elementëve bërthamorë, ata mund ta bëjnë punën. Përveç kësaj, Kievi ka aftësi raketore. Gjithashtu, atje, në anën tjetër të oqeanit, ata do të ndihmohen për ta bërë këtë”, tha Putin, duke shtuar:
“Ne kërkojmë çmilitarizimin e këtij vendi, sepse duam të kuptojmë qartë dhe saktë se ku janë armët dhe nën kontrollin e kujt”, tha Putin.
Në fjalimin e tij, presidenti rus vuri në dukje gjithashtu se synimi i Ukrainës për t’u anëtarësuar në NATO mund të çojë në pasoja të rënda.
“Qëllimet e operacionit rus në Ukrainë janë denazifikimi dhe çmilitarizimi i vendit, sigurimi i statusit neutral. Pse statusi neutral? Sepse nëse vendi ka status neutral, atëherë nuk do të anëtarësohet në NATO”, tha Putin dhe vazhdoi:
“Nëse Ukraina do të ishte një fuqi bërthamore dhe një anëtare e NATO-s, Aleanca nuk do të kishte nevojë për raketa balistike për të penguar Rusinë, por do ta mbante Rusinë në shënjestër të armëve bërthamore në kufirin e saj”.
Ai tha se qëllimet e çmilitarizimit pothuajse u arritën sepse “armët, municioni, aviacioni dhe sistemet e mbrojtjes ajrore pothuajse u shkatërruan”.
Putin tha gjithashtu gjëra të rreme, të tilla si se Rusia ishte “përpjekur t’i jepte fund konfliktit në Donbas në mënyrë paqësore për tetë vjet” dhe se kërkesat e rajoneve të shkëputura “nuk ishin të mëdha”. Ai tha gjithashtu se “masat e marra ndaj tyre ishin shumë të ashpra”, dhe dënoi vendet perëndimore për “mos vërejtjen e problemeve të njerëzve që jetojnë në Donbas për gati një dekadë”.
Përpara fillimit të luftës kundër Ukrainës javën e kaluar, Rusia njohu si shtete të pavarura dy enklava të mbajtura nga separatistët pro-rusë në rajonin e Donbasit të Ukrainës.
Lidhur me çështjen e evakuimit të civilëve, Putin tha në stilin e Slobodan Millosheviçit se Rusia pranoi menjëherë propozimin e Ukrainës për të organizuar korridore humanitare në qytetet Mariupol dhe Volnovakha, por civilët nuk u lejuan të largoheshin.
“E shihni se çfarë po ndodh, askush nuk lejohet të largohet. Ato përdoren si mburoja njerëzore. Kush e bën këtë? Sigurisht, neo-nazistët,” shtoi Putin.
Ai tha gjithashtu se rreth 6,000 studentë të huaj po mbaheshin në një stacion treni në qytetin ukrainas të Kharkiv, dhe i quajti ata “pengje”.
Ai gjithashtu vuri në dukje se ushtria ruse ka pikasur militantë nga Lindja e Mesme dhe disa vende evropiane në Ukrainë.
Putin shpjegoi gjithashtu vendimin e tij për të vendosur forcat bërthamore të Rusisë në gatishmëri të lartë, duke thënë se kjo u nxit nga një deklaratë e Sekretares së Jashtme britanike Elizabeth Truss, e cila tha se NATO duhej të ishte e përfshirë në konfliktin në Ukrainë.
Udhëheqësi rus mohoi se Rusia do të vendoste një gjendje të jashtëzakonshme, duke thënë se ligji ushtarak u vendos në vend me dekret presidencial në rast të agresionit të jashtëm.
“Por ne nuk kemi një situatë të tillë dhe shpresoj se nuk do ta kemi”, tha Putin. /tesheshi.com/
