Presidenti rus Vladimir Putin ka paralajmëruar se është gati të dërgojë policinë në Bjellorusi nëse protestat në vend bëhen të dhunshme, por shtoi në një intervistë se aktualisht nuk ka nevojë për të dhe shprehu shpresë për stabilizimin e situatës në vendin fqinj.
Presidenti bjellorus Aleksandër Lukashenko, i cili ka drejtuar vendin për 26 vjet, përballet me javë protestash kundër rizgjedhjes së tij për një mandat të gjashtë në zgjedhjet e 9 gushtit, për të cilat opozita pretendon se ishin manipuluar.
Putin i tha televizionit shtetëror rus se Lukashenko i kishte kërkuar atij që të përgatiste një kontigjent të policisë ruse që do të dërgohej në Bjellorusi nëse është e nevojshme.
Ai tha se ai dhe Lukashenko u pajtuan se “nuk ka nevojë për atë moment, dhe unë shpresoj se nuk do të ketë”.
“Ne kemi rënë dakord të mos e përdorim atë (policinë) derisa situata të fillojë të dalë jashtë kontrollit dhe elementët ekstremistë të veprojnë nën maskën e parullave politike, të kalojnë kufij të caktuar dhe të marrin pjesë në akte banditësh dhe të fillojnë të djegin makina, shtëpi dhe banka ose të pushtojnë ndërtesa administrative”. tha udhëheqësi rus, raporton Associated Press. /tesheshi.com/
