Vladimir Putin ka folur para takimit të G20-tës në Kinë, duke thënë se Rusia dhe Shtetet e Bashkuara të Amerikës mund të jenë pranë arritjes së një marrëveshjeje mbi Sirinë, pavarësisht dallimeve mbi zgjidhjen e konfliktit.
Siç raporton agjencia e lajmeve Reuters, e cila i referohet Bloomberg-ut, Putin ka thënë se bisedimet ishin të vështira, por në rrugën e duhur.
“Sipas meje,” janë fjalët e presidentit rus, “ne po lëvizim dalëngadalë në drejtimin e duhur.”
“Nuk e përjashtoj që të në të ardhmen e afërt të mund të pajtohemi mbi diçka, e t’ia tregojmë këtë marrëveshje bashkësisë ndërkombëtare.”
Kryediplomatët e të dy vendeve, Lavrov e Kerry, nuk ia dolën të kishin një marrëveshje javën e shkuar pas bisedimeve të gjata, por lanë të kuptohej gjithashtu se po shkohej drejt saj.
Me luftimet që vazhdojnë në Siri, pikësynimi është arritja e një armëpushimi të gjerë. /tesheshi.com/
