Takimi në Moskë ditën e djeshme i dy shtetarëve më të lartë të Rusisë dhe Francës, presidentit Putin dhe homologut të tij Hollande, është mbyllur me pajtimin se duhet forcuar bashkëpunimi në luftën kundër ISIS-it. Sidoqoftë, Putin dhe Hollande nuk kanë qenë në një qëndrim mbi të ardhmen e Beshar Esadit.
“Ajo për të cilën u pajtuam është goditja vetëm e terroristëve dhe e ISIS-it, dhe jo e forcave që luftojnë terrorizmin. Ne do të shkëmbejmë informacion se kë të godasim dhe kë të mos godasim,” deklaroi Hollande në konferencën e shtypit.
Franca dhe Rusia do të shkëmbejnë informacione mbi ISIS-n dhe grupet e tjera rebele për të përmirësuar efektshmërinë e sulmeve ajrore mbi Siri, bëri të ditur Hollande. Njëkohësisht, Franca do të shtojë mbështetjen për grupet rebele që luftojnë kundër ISIS-it në terren.
Në lidhje me të ardhmen e regjimit sirian, presidenti francez kërkoi krijimin e një qeverie tranzicioni, që do të përgatiste një kushtetutë të re dhe do të zhvillonte zgjedhjet në Siri, duke theksuar se Esadi nuk kishte vend në të ardhmen e vendit të shkatërruar prej luftës.
Në kundërshtim me të, presidenti Putin i ka qëndruar idesë së mëhershme, se është populli sirian që duhet të vendosë mbi fatin e Esadit. Putini shkoi më tej, duke e quajtur ushtrinë siriane të regjimit një “aleat të natyrshëm” të çdo koalicioni ndërkombëtar që lufton ISIS-in. /tesheshi.com/
