Pas gjashtë orësh bisedimesh, një takim midis presidentit rus Vladimir Putin dhe homologut turk Rexhep Tajip Erdogan përfundoi në Moskë me vendimin për uljen e armëve në Idlib. Të dy udhëheqësit ranë dakord për një dokument të përbashkët për të normalizuar situatën në qytetin e trazuar sirian, fronti i fundit i një lufte të përgjakshme.
Armëpushimi në Idlib nis në mesnatë, tha Erdogan.
“Ne do të krijojmë një armëpushim (në Idlib) sa më shpejt të jetë e mundur dhe pastaj të vendosim së bashku për hapa të tjerë urgjentë,” shtoi presidenti turk. Ai gjithashtu vuri në dukje se një status i ri për Idlibin ishte i pashmangshëm pas sulmeve të regjimit ndaj ushtrisë turke në rajon, dhe se fryma turke e bashkëpunimit me Rusinë kishte dhënë një kontribut të paparë në përpjekjet ndërkombëtare për t’i dhënë fund konfliktit në Siri. Ai gjithashtu tha se pavarësisht marrëveshjes së sotme, Turqia rezervon të drejtën t’i përgjigjet çdo sulmi të drejtuar kundër anëtarëve të ushtrisë së saj.
Erdogan paralajmëroi më tej se nuk mund të pranohet që katër milion njerëz që jetojnë në Idlib do të shpalleshin terroristë dhe të bombardoheshin nën këtë pretekst.
Ministri i Jashtëm rus Sergei Lavrov thotë se Rusia dhe Turqia kanë rënë dakord të formojnë një korridor sigurie gjashtë kilometër në veri dhe jug të rrugës strategjike të rëndësishme M4 në Siri.
Lavrov gjithashtu tha që të dy vendet ranë dakord të fillojnë patrullimin e përbashkët përgjatë M-4 B. më 15 mars, duke lidhur Latakian dhe Halepin. /tesheshi.com/
