Presidenti turk Rexhep Tajip Erdogan foli me telefon me presidentin rus Vladimir Putin të shtunën për çështjet rajonale, veçanërisht eksportet e drithit dhe termocentralin bërthamor të Zaporozhye, si dhe marrëdhëniet midis dy vendeve.
Erdogan tha se Turqia mund të luajë rolin e një ndërmjetësi kur bëhet fjalë për termocentralin bërthamor në Zaporozhye, siç bënë në marrëveshjen për eksportin e grurit, njoftoi Zyra e Komunikimit e Presidencës Turke, raporton Anadolia.
Të dy krerët përsëritën vendosmërinë e tyre për të vazhduar me termocentralin bërthamor Akkuyu siç ishte planifikuar.
Shërbimi informativ i Kremlinit njoftoi se Putin dhe Erdogan ranë dakord për nevojën e intensifikimit të kontakteve ekonomike midis dy vendeve, veçanërisht bashkëpunimin strategjik në projektet energjetike.
Erdogan dhe Putin ranë dakord të diskutojnë të gjitha këto dhe çështje të tjera në detaje në një takim në Samarkand, ku do të takohen me rastin e samitit të Organizatës së Bashkëpunimit të Shangait më 15 dhe 16 shtator. /tesheshi.com/
